Umpire-in vaw chhia - King

Hmeichhe tennis player zinga ropui ber zinga mi Billie Jean King chuan US Open hmeichhe final-a Serena Williama chet dan chu mawi lo ti mah se umpire Carlos Ramos chu mawhphurtu a nih thu a sawi.

Japanese star Naomi Osaka chuan final-ah straight set-in Serena a hneh a, American tennis star hian vawi thum dan a bawhchhiat avangin point paih sak a nih bakah game lak sak a ni a. Kum 36 mi Serena hian uchuak takin umpire hi a chhuahchhal a ni.

Hemi chungchang hi sawiin King chuan, "Serena chet dan kha a dik lo hul hual a, thup theih a ni lo. Amaherawhchu Ramos khan thil thleng kha a tizualkai a, umpire khan final boruak a vaw chhe vek a ni," tiin a a sawi.

Kum 74 mi Billie Jean King hian grand slam pali Australian Open (1), French Open (1), Wimbledon (6) leh US Open (4) a champion vek tawh a ni.