SAFF Championship Pakistan ngamtu India-in final an lut

South Asian Football Fede­ra­tion Championship-ah India chuan final an lut a, Nilaini zan khan an hmelma kumhlum Pakistan chu 3-1 in an hneh.

Bangladesh khawpui Dha­ka a inkhelah Lallianzuala Chhangte chu red card pek a ni a, Lunglei rawlthar a vanduai hle - Inrinni zan dar 6:30-a Maldives nen final an khelh hunah a inlan thei lo ang.

India tan Manvir Singh chuan goal hnih a khung a, minute 10 chiah hun a awm tawh tiha luhtir Sumeet Passi chuan goal khat khung ve bawkin a 'birthday' a lawm.

Game a mawi

Bangabandhu National Stadium, Dhaka-a inkhelah Pakistan-in a tir lamah chance nei hmasa zawk mah se India game a mawi zawk a, ball mawi tak taka inpek an neih karah chance an nei leh ṭhin.

India tan striker pasang Manvir Singh chuan chance duhawm tak a hlah hnuah hun ṭha dang a nei leh a, Ashique Kuruniyan cross ṭha zet chu tlu chungin a tlawh lut a, India-in hma an hruai.

Blue Tigers-in inkhel an thunun chhunzawm a, goal dang erawh an nei leh lawk thei bik lo - goal dang lut loin chawlhlawk hman a ni.

Manvir bawk chu

Sunil Chhetri leh Jeje Lalpekhlua awm loh hlanin Manvir Singh-a'n India first choice pahnih thachhang dawl tur chuan a ṭha tawk tih a pholang nawn a, minute 72-naah India goal hnihna a khung.

Goal hnihna luhna kawngah Lallianzuala Chhangte chu player thawhhlawk a ni. Lung­lei rawlthar hian counter attack hmanga Pakistan nawr letin Vinit Rai a pe a, Rai hian penalty area pawn hret aṭangin Manvir hi pe ve lehin Punjab striker tan goal-a chantir turin harsatna a awm lo.

India-in an duhtawk lo, hun tawp nan minute nga chiah a awm tawh tihah Sumit Passi chuan a tauh goal ve leh a, Ashique Kuruniyan siamsak a ni. Pakistan tan Mohammad Ali chuan goal khat rawn khung ve mah se score­line timawitu chauh a ni tawh.

Lianzuala a vanduai

Mizo tlangval Lallianzuala Chhangte-in inkhel bul ṭan lo mah se minute 69-naah Nikhil Poojari thlak turin tlan luhtir a ni a, Delhi Dynamos forward hian a khel ṭha hle.

Mahse, minute 86-naah Lian­zuala hi tih tluk a ni a, amah ti tlutu Pakistan player hian a kutin a nghawngah a kuah lui zui. Lunglei rawlthar insum zo loin an khingpui player hi a thawh pahin nghawk let.

Pakistan defender Mohsin Ali chuan Lian­zuala hi a rawn nam zui a, referee chuan Mohsin Ali leh Lianzuala te red card a pe ve ve a, Lunglei rawltharin final a khel dawn ta lo. Lianzuala chuan, "Tawnhriat neih tlem vang a ni a, inzir nan ka hman ka tum ang," tiin Vanglaini a hrilh.

Inkhel dang chu

SAFF Championship semi­final inkhel dangah Maldives chuan 3-0 in Nepal an hneh ve bawk a, final-a India tawng turin an in pet tling.

Maldives tan Akram Abdul Ghanee chuan goal hmahruai khungin Ibrahim Waheed Hassan chuan goal hnih a khung ve bawk a, Nepal lamin a chhanletna tur an neih loh avangin an tlawm.

Group Stage-ah India leh Maldives hi lo intawng tawhin Nikhil Poojari leh Manvir Singh goal hmangin 2-0 in an chak a, Inrinni zana final an khelh hunah pawh India hi chak nawn tura beisei an ni.

India final kalkawng
Group Stage
India 2 - 0 Sri Lanka
IND: Ashique Kuruniyan 35'; Lallianzuala Chhangte 47'
India 2 - 0 Maldives
IND: Nikhil Poojari 36'; Manvir Singh 44'
Semifinal
India 3 - 1 Pakistan
IND: Manvir Singh 48'; Sumeet Passi 84'
Final
September 15, Inrinni Zan
India 6:30 PM Maldives