Liverpool fiahna hun a thleng ta

Premier League-ah match li khelh a ni tawh a, hmahruaitu chu Liverpool an ni. Merseyside club hian an league match hmasa paliah hnehna an chang vek a, Jurgen Klopp leh a nauten fak an hlawh hle.

Mahse, Liverpool hian fiahna tak tak an la hmachhawn tawk lohah ngaih a ni - an team hneh hi West Ham, Crystal Palace, Brighton & Hove Albion leh Leicester City an ni a, big six huam chhunga team hmachhawn an la nei lo.

Vawiin tlai dar 5:00-ah Liverpool inlan hun a thleng leh ta a, an hmachhawn tur chu Tottenham Hotspur a ni. Reds tan fiahna tak tak a thleng dawn ta nia ngaih a ni a, an mikhualna ramah point thum hlawhchhuah an tum ang.

Rimawi chu!
Liverpool-in fiahna hautak an hmachhawn dawn kan ti a, Tottenham ṭantu tana thu hriat nuam lo tak, Reds tana rimawi ni si hriat tur a awm zui nghal - goalkeeper Hugo Lloris leh midfielder Dele Alli ten Liverpool an hmachhawn ve thei dawn lo!

Kum 31 mi Lloris hian a malpuiah hliam a tuar a, Spurs chuan an captain hian kar engemaw zat chu chawlh a mamawh thu an sawi. French goalkeeper hi tun hnaiah zu rui chunga motor a khalh avangin man a ni bawk a, thla 20 chhung motor khalh thei lo tur leh £50,000 chawi turin hrem a ni.

Lloris chhawr theih loh ringawt pawh hna hautak a nih tehlul nen Spurs tan chanchin lawmawm lo dang a awm a, England tana a fehchhuahna lamah midfielder pawimawh Alli a inhliam. Spurs manager Mauricio Pochettino chuan, "Alli hian Spain lakah hliam a tuar a, a vanduaithlak hle. Mahse, chi ai hluaina tur erawh a ni lo e," a ti a, Alli tel loin Liverpool a hlau lo.

Harhna pawimawh
Liverpool leh Tottenham Hotspur te intawn hnuhnung vawi 11-ah Spurs hi vawi khat chiah an chak ve a, an chak awmchhun erawh season hmasa kha niin Wembely-ah 4-1 in an mikhual Liverpool an lo hneh.

Jurgen Klopp chuan he inkhel hi thlirkirin, "Maribor laka 7-0 a kan chak hlim kha a ni a, khati zata chak kha a khat em em a, a hnu lawka Tottenham tum lehnghal chu a harsa a ni. Mahse, kha result avang khan tih harhin kan awm a, result ṭha tak tak kan nei zui a ni," a ti.

Liverpool midfielder hlui Graeme Souness chuan tuna Reds hi 1990 league nomawi chawi team nen a khaikhin a, Klopp chuan, "Team ṭha taka min ngaih avangin ka lawm a, mahse 1990 team kha enge an nih ka hre lo. Tuna pawimawh ber chu team ṭha ber nih lam a ni lo a, match tina a ṭha zawk nih zel hi a ni," tiin Spurs laka point thum hlawhchhuah a tum.

Hmabak hautak
September a inṭan a, Liverpool hmabak a hautak chhunzawm nghal. Reds hian Spurs zawhah hian Paris Saint-Germain, Southampton, Chelsea, Napoli leh Manchester City an hmachhawn chhunzawm dawn a, hna a hautak dawn.

Hei vang tak hian Liverpool tan chak a pawimawh a, Spurs lakah an chak zo lo a nih vaih chuan an hmabak game hautakah an insiamṭha hman lo ang tih a hlauhawm - Klopp chuan player a thlak kual tur thu a sawi.

German coach chuan, "Ni 23 chhungin match sarih khelh tur kan nei a, squad a pawimawh takzet dawn a ni. Mahse, Spurs kan tum zawha kan hmachhawn tur lam erawh ka ngaihtuah lo a, kan match hmabak zel ngaihtuah hi kan tum ber chu a ni," a ti.

Kane a 'fit'
Harry Kane-a'n Tottenham tan match li khel tawhin goal hnih a khung a, international break laiin ram tan goal khung a nei lo. English striker-in sawisel a hlawh a, fitness ṭha tawk lo ang hialin an chhuah.

Mahse, Pochettino chuan a striker hi chhanin, "Striker-in goal a khung lo a nih chuan miin a chhan an zawng fo ṭhin a, mahse Kane hian harsatna a nei lo. A pawimawh ber chu amah hi kan ring em em a, a chungah kan rinna kan nghat tlat a ni.

"Harry Kane hi kan hrechiang a, kum li aia tam mah kan thawk dun tawh a, tun hi a laka lunghnur hun a ni lo," tiin Kane chuan goal a la khung dawn chauh thu a sawi - Liverpool lakah a beisei nghal ang.

Zanin Inkhel Tur
Tottenham Hotspur 5:00 PM Liverpool
AFC Bournemouth 7:30 PM Leicester City
Chelsea 7:30 PM Cardiff City
Huddersfield Town 7:30 PM Crystal Palace
Manchester City 7:30 PM Fulham
Newcastle United 7:30 PM Arsenal
Watford 10:00 PM Manchester United
September 16, Pathianni
Wolverhampton 6:00 PM Burnley
Everton 8:30 PM West Ham United
September 17, Thawhtanni Zan
Southampton 12:30 AM Brighton & Hove
Team Dinhmun
# Team Pld W D L GF GA GD Pts
1 Liverpool 4 4 0 0 9 1 8 12
2 Chelsea 4 4 0 0 10 3 7 12
3 Watford 4 4 0 0 9 3 6 12
4 Manchester City 4 3 1 0 11 3 8 10
5 Tottenham Hotspur 4 3 0 1 9 4 5 9
6 AFC Bournemouth 4 2 1 1 6 5 1 7
7 Everton 4 1 3 0 7 6 1 6
8 Leicester City 4 2 0 2 6 5 1 6
9 Arsenal 4 2 0 2 8 8 0 6
10 Manchester United 4 2 0 2 6 7 -1 6
11 Wolverhampton 4 1 2 1 4 5 -1 5
12 Southampton 4 1 1 2 4 4 0 4
13 Fulham 4 1 1 2 7 9 -2 4
14 Brighton & Hove 4 1 1 2 5 7 -2 4
15 Crystal Palace 4 1 0 3 3 6 -3 3
16 Cardiff City 4 0 2 2 2 5 -3 2
17 Huddersfield Town 4 0 2 2 2 10 -8 2
18 Newcastle United 4 0 1 3 3 6 -3 1
19 Burnley 4 0 1 3 3 9 -6 1
20 West Ham United 4 0 0 4 2 10 -8 0