Electric Veng a êng
Electric Veng FC-in NorthEast aṭanga I League champion thei hmasa ber Aizawl FC an hneh hnuah tualchhung football-a sulhnu nei ṭha ber zinga mi Mizoram Police FC an hneh. MPL club thar hian I Day Football-ah semifinal an thleng tawh a, Mc Dowell's No 1 Soda Mizoram Premier League-a bul an ṭan danin vanneih vanga thleng sang an ni lo tih an nemnghet.
Nimin Lammual inkhelah goal chance tam mah se goal erawh a lut har a, Electric Veng striker David Lalchhuanawma chuan minute 85-naah goal awmchhun a khung a, Salem Veng tlangval hi man of the match-ah thlan a ni bawk. MPL7-ah champion lai Chhinga Veng leh Electric Vengin match hnihah point ruk ve ve an hmu a, an goal difference inang chiah bawkin hmahruaitu an ni.
Chhuanlam a awm lo!
Mizoram Police-in an match hmasa bera Bethlehem Vengthlang FC hnehtute an chhawrh theih laiin Electric Veng erawhin right back C. Lalnunmawia leh winger Vanlalremsanga te hliam vangin an chhawr thei lo.
EFC tana thu lawmawm erawh captain Laldinmawia a dam tawh a, ani hian Aizawl FC an hneh ṭuma khel ṭha H. Zawnhmingthanga a thlak. Police-in tlarhmaah Mizoram tana inlan tawh hlir an chhawr theih avangin rinkai an ni a, an hming aṭanga thlir chuan buk rit zawk an ni.
Tlarhnung pawp
Mizoram Police tlarhnung an la insiamṭha lo tih a lang thei nghal a, an ṭuan a fum deuh tawh avangin winger tlan chak M. Lalrintluanga leh Lahmangaiha te lakah an talbuai nghal hle.
Lunglei rawlthar Tluanga'n first half chance ṭha bik a hlah a, Hmangaiha thawhrah chu goal-ah a chantir thei lo a, hemi hnu hian keeper Lalṭanpuia chiah a hmachhawn hnuah goal zawnah a pet lo a, seocnd half-ah keeper nen chauh a khung lo leh bawk.
Police-in awmze neiin an khel thei lo a, captain V. Lalṭanpuia ball pet erawh EFC keeper Lalrinnunga Hnamte-in a dang ṭha takzet. Second half-ah Police-in F. Lalrinpuia'n freekick hmangin goal ban a pet per a, hemi hnu hian Simon Lalruatkima'n goal ban tihper nawn mah se chak an phu lo zawk.
A tawpah David
Police tlarhnung te an tlan chak lo nachungin keeper leh defence inkarah hmunawl an zuah zau a, hemi hmun ruak hi Electric Vengin nawr nan ber an hmang chungin an insiam ṭha thei lo.
Minute 85-naah David-a'n defender tihsual chu halfway line pelh hretah changin a khalh lut nghal a, keeper ṬP-a dan theih lo turin a ke vei lamin cool takin a khung. Salem Veng tlangval hi tun hmain left back-ah khel ṭhin mah se Electric Vengin striker atan an chhawr a, out and out striker hna a tlin rih hle.
Electric Veng 1- 0 Mizoram Police
EFC : David Lalchhuanawma 85'
MoM: David Lalchhuanawma, EFC
47% Ball Possession 53%
9(4) Shots (On Target) 18(6)
0 Woodwork 2
3 Corners 6
6 Offsides 2
1 Yellow Card(s) 3
0 Red Card(s) 0
# Team Pld W D L GF GA GD Pts
1 Chhinga Veng FC 2 2 0 0 3 1 2 6
2 Electric Veng FC 2 2 0 0 3 1 2 6
3 Chanmari FC 2 1 1 0 4 2 2 4
4 Mizoram Police 2 1 0 1 1 1 0 3
5 Aizawl FC 2 0 1 1 3 4 -1 1
6 Bethlehem VT 2 0 0 2 1 3 -2 0
7 Chawnpui FC 1 0 0 1 0 1 -1 0
8 Ramhlun North 1 0 0 1 0 2 -2 0