Premier League-ah VAR enchhin dawn
Zanin hian Premier League-ah a vawi khat nan video assistant referee (VAR) chu enchhin a ni dawn a, zan dar 7:30-a inkhel tur pangaah VAR hi hman a ni ang.
Enchinnaah hian hmun khat aṭangin inkhel panga te hi an thlir ang a, inkhela thutluknaah erawh an inrawlh lo thung ang. Season liam ta khan Premier League inkhel malah chuan enchhin a ni tawh a, tun ṭumah hian match khata aia tamah enchhin a ni dawn.
Kumin April thla khan Premier League club te chuan 2018-19 season-a hmang lo turin thutlukna an siam tawh a, amaherawhchu enchhinna erawh kalchhohpui zel tur niin season liam taa match 19 enchhin kha tunah chuan match 60-ah zirchianna neih a ni dawn.
VAR hi EFL Cup leh FA Cup-ah te chuan hman a ni tawh a, European league sang dang Bundesliga leh Serie A ah te chuan hman ni tawhin La Liga-ah tun season aṭanga hman ṭan a ni dawn a. Kumin World Cup-ah khan hman a ni tawh bawk.