SAFF Championship ; India leh Maldives-in champion inchuh dawn

South Asian Football Fede­ration Championship final chu zanin dar 6:30 hian khelh a ni dawn a, Maldives leh India te cham­­­pion inchuhin an intawng ang.

Mizo tana thu hriat nuam lo tak chu Lallianzuala Chhangte a inlan thei dawn lo. Lunglei rawl­thar hian semifinal-a Pakistan an hneh ṭumin red card a hmu a, Delhi Dynamos forward tel loin India an khelh a ngai dawn.

India coach Stephen Cons­tan­tine-a'n player a inkhelh chhawk tir ṭhin avangin Jerry Lal­rinzuala a inlan dawn leh dawn loh a chiang lo a, Lian­zuala a awm dawn loh avangin Bethlehem rawlthar hi SAFF Cup final-a Mizo chhawr theih awmchhun a ni dawn tihna a ni.

Maldives belchiang ila

FIFA rangking-a 150-na Mal­dives hian final lut turin semifinal-ah Nepal chu 3-0 in an ngam a, Nepal laka an chak ṭum hian kawng tinrengah an chungnung a, group stage-ah India lo hneh lo tawh mah se an zam lo ang.

Kum 22 mi forward Naiz Hassan hi tlarhmaah Maldives innghahna a ni dawn a, ram tana vawi 18 inlana goal kua khung thei a nih avangin hmabak a nei eng hle - India tlarhnung tan ven uluk a fin thlak dawn.

Tlarhnungah captain Akram Abdul Ghanee chu innghahna tur a ni dawn a, kum 31 mi defender hian tawnhriat a ngah tawh avangin tawnhriat nei tlem rual awmna India lakah a ṭangkai khawp ang.

A hming chu Petar

Maldives coach Petar Segrt hi German mi niin Germany club hriat hlawh VfL Bochum leh MSV Duisburg-ah te pawh assistant coach lo ni tawh a ni a, Austria, Bosnia leh Indonesia lamah club hrang hrang a lo enkawl tawh bawk.

Georgia leh Afghanistan chu Maldives a enkawl hmaa ram team a enkawl a ni a, player naupang rual chher a thiamna chu a hmingṭhatpui ṭhin hle. Georgia a enkawl lai hian U21 player enkawl tel tir a ni a, player 18 ngawt chu senior team tana khel thei turin a chher chhuak.

Indonesian Premier League-ah kum khat lek hun a hman chhungin Indonesian player hriat la hlawh ngai lo 10 ngawt a chher chhuak a, paruk chu an ram team tana khel tura koh an ni hial - July 2012 khan a club enkawl PSM Makassar chuan kum nga chhung atan contract an zawrh hial a, coach tana heti zat contract inzawrh hi Indonesian football-a thleng zen zen lo a ni.

India dinhmun

Blue Tigers-in group stage-ah Maldives an hneh tawh avangin an inringtawk ang a, final lut tur hian an kalkawngah goal sarih khungin goal khat chiah an chhuah a, senior player rual awm lo mah se an khel ṭha ṭhin hle.

Tlarhmaah India tan Manvir Singh chu innghahna a ni a, FC Goa striker hian semifinal-ah Pakistan lakah goal hnih a khung a, tun tournament-ah goal thum a khung tawh.

Midfield-ah Pune City player pahnih Nikhil Poojari leh Ashique Kuruniyan te an khel ṭha ṭhin a, Vinit Rai hming lam hmaih a thiang lo bawk. India squad-a kum upa ber Sumeet Passi, Poojari leh captain Subhasish Bose te hi kum 23 an ni a, India player an naupang hle - ram tana la champion ngai lo hi a tam zawk an nih miau avangin champion an chak khawp ang.

A harsa dawn

India coach Stephen Con­stan­tine chuan Maldives chu an hneh hnu mah ni se an tan kalkawng a awlsam loh tur thu a sawi. English coach chuan, "Maldives hian semifinal-ah khan an khel ṭha takzet a, 3-0 a Nepal hneh theih kha thil awlsam a ni lo.

"Maldives kha group stage-ah kan hneh ngei a, mahse kan inkhelh ṭum kha chuan semifinal-a Nepal an sawp ṭuma inlan player engemawzat an inlan lo a, final-a kan tum tur Maldives hi chu an dang tawh ang.

"Game hautak kan khel dawn tih a chiang a, mahse ka sawi fo ṭhin angin he hmunah hian champion tura lokal kan ni," tiin a sawi a, nomawi nen India-a rawn haw ngei an tum.

India final kalkawng
Group Stage
India 2 - 0 Sri Lanka
IND: Ashique Kuruniyan 35'; Lallianzuala Chhangte 47'
India 2 - 0 Maldives
IND: Nikhil Poojari 36'; Manvir Singh 44'
Semifinal
India 3 - 1 Pakistan
IND: Manvir Singh 48'; Sumeet Passi 84'
Final
Zanin inkhel tur, Final
India 6:30 PM Maldives