Chhinga Veng tan thiam leh vanneih inkawp

Mc Dowell's No. 1 Soda Mizoram Premier League Season 7-ah champion lai Chhinga Veng chuan Ningani zan khan Bethlehem Vengthlang FC laka goal khata an hnufual hnuin F. Lalnuntluanga leh Jacob Lalrawngbawla te goal mawi hmangin 2-1 in an lehthal.

Chhinga Veng-in an coach Lalsangzuala Hmar hnuaiah match 19 chhung hneh loh nei loin an kaltluang tawh a, tun season bikah match 13 khel tawhin an la chak vek bawk.

BVT an thawkrim

Bethlehem Vengthlang FC-in hming langsar an kawl tam lo a, khelmual chhunga an thawhrim avangin champion lai Chhinga Veng meuh pawhin khelh harsa an ti.

First half-ah team ṭha zawka ngaih Chhinga Vengin goal chance ṭha an insiam thei lo a, Jacob Lalrawngbawla freekick ṭha tak erawh K. Lalthlahlova khawih hman se goal thei tur a ni thung.

BVT-in awmze neia Chhinga Veng an khelh theih loh nan pressure an pe ṭha a, Chhingcows keeper Lalmuansanga ball pet chhuak tur thlengin an tibuai hman. Minute 43-naah an thawhrim rah an seng a, box pawn chiaha an freekick hlawhchhuah chu Dina Varte-in wall pet khum chiahin goal kilah a lut.

Player ṭha an dang

BVT-in second half-ah goal venhim hna an thawk chhunzawm a, amaherawhchu Chhinga Veng player-te theihna sang tak erawh dan reng a har thung.

Minute 69-naah Tluanga'n dinglam aṭanga ball lain a ke vei lamin hla tak aṭangin a pet goal. Chhinga Veng winger hian season liam ta khan MPL Under 18-ah Chhingcows champion puiin top scorer a ni a, Khelo India-ah Mizoram champion puiin final-ah goal a khung a, first division-ah top scorer ni chungin Zo United a champion pui bawk.

BVT an chesual chhunzawm a, minute hnih hnuah ball pet thiam vanga lar Jacob-a'n box pawn chiahah ball chang fuhin chakna goal khung nan a hmang.

Minute hnih chhung lekin Chhinga Veng chu dinhmun ṭha zawkah an inhlang kai a, BVT coach H. Lalhlimpuia'n inkhel thlak danglam tumin tlarhnung a rawn pui a, defender Jonathan H. Lalhriatkima chu striker-ah tawlh hmatir ni mah se result a danglam phah lo.