Golovkin v Alvarez - A hun a thleng ta

'Fight of the Century' tiin hminglem hial an pe a, ṭhenkhatin, "Boxing chanchina hriat reng tawh tur," tiin an sawi bawk - Pathianni zing dar 8:30 khian Canelo Alvarez leh Gennady Golovkin te chu a vawi hnih nan an inhmachhawn leh dawn ta.

Mipui lenna T-Mobile Arena, Las Vegas-a inhnek tur hi ticket zawng zawng hralh zawh vek a ni tawh a, khawvelin a ngaihven hle - Golovkin hian WBC leh WBA middleweight kawnghren a kawl mek a, Canelo lakah hian a venghim leh a nih chuan record siamin vawi 21 ngawt mahni title venghim thei hmasa ber dinhmun a luah ang.

Golovkin chuan a tana he inhnek pawimawh zia hi sawiin, "Fighter, legend leh mi huaisen tak tak he infiamna huangah hian ka lo hre tawh ṭhin a, a vawi 21 nana ka titlte ka humhim thei a nih chuan 'legend' ni turin hmalam ka pan dawn tihna a ni," a ti a, hnehna chan ngei a tum.

Hetihlai hian social media lamah Canelo insawizawi lai video a darh nasa a, tun hma zawng aiin a taksa pawh a ṭha zual niin a lang.

Mexican boxer erawh a ṭawng chapo duh lo a, "Canelo pangngai reng kha ka la ni a, a hmaa Canelo tho kha ka la ni reng a ni. Ka taksa, ka pumrua, ka speed, engkim hi a la danglam lo," a ti a, a nih dan pangngai chu Golovkin hneh nan a ṭha tawkah a ngai.

Boxer pahnih khaikhinna
Golovkin vs Alvarez
36 Kum 28
Kazakhtsan Ram Mexico
Middleweight Division Middleweight
Orthodox Stance Orthodox
5ft 10.5in San zawng 5ft 8in
70in Reach 70.5in
39 Bouts 52
38 Chak zat 49
34 KOs 34
NIL Tlawm 1
1 Draw 2