Mourinho-a'n lem a chang ngai lo - Lukaku

Manchester United striker Romelu Lukaku chuan Premier League manager dang angin Jose Mourinho-a'n lem a chan ngai loh thu a sawi.

United chuan zanin dar 10:00 hian Premier League match li khelh tawha la chak vek Watford hmachhawn turin an khelmual Vicarage Road-ah an lenglut dawn.

Belgian striker Lukaku chuan, "Mourinho hian a rilru put hmang a thup ngai lo. A lungawi lo a nih chuan a chet dan aṭangin a lang nghal a, a lawm a nih pawhin a lang nghal bawk. Mi tak tak an lawm lohna chhan hi ka hrethiam lo. Ka chunga a lawm lo a nih chuan a hriat nghal a, tih lawm dan ka zawng leh mai ṭhin," tiin United boss-in lem a chan ngai loh thu a sawi.

Kum 25 mi Lukaku hian league match hnuhnung bera Burnley 2-0 an hneh ṭumin goal a khung ve ve a, Belgium tan Scotland nen friendly match-ah goal khat khungin Nations League-a Iceland 3-0 a an hneh ṭumin goal hnih a khung leh bawk.

Mourinho nena inkar chungchang sawiin Lukaku chuan, "Kan boruak a ṭha a, min tihlim a, player dang pawh a tihlim a, chhungkaw pa tak a ni. A player tan theihtawp a chhuah ṭhin a, mipa dik tak a ni a. A ze huaisen tak hian zah a phu a, hma kan sawn hi a duh takzet a ni," tiin a fak hle.

Lukaku hian kum 2011 khan Chelsea zawmin Premier League-ah goal 104 a khung tling tawh a, hetiang zat khung tur hian Blues legend Didier Drogba aiin match 30 laiin a mamawh tlem zawk. Amaherawhchu, Lukaku chuan, "Ani chuan Premier League nomawi pali a chawi tawh a, kei chuan ka la chawi lo," tiin a tluk loh thu a sawi.

Belgian striker chuan Chelsea striker hlui Drogba, Belgium assistant manager Thierry Henry leh a teammate hlui Nicolas Anelka ten tun dinhmun a thlen theih nana an puih nasat thu a sawi lang bawk.