Ronaldo goal khung hun?

Juventus coach Massimiliano Allegri chuan pound makatduai 99 senga a lakluh Cristiano Ronaldo-a'n goal la khung lo mah se buaina an neih loh thu a sawi a, atan hun ṭha a inher chhuah mai tur thu a sawi.

Italian champion hian Pathianni zan dar 6:30-ah Sassuolo an mikhual dawn a, match thum a khelh aṭanga goal la khung miah lo Ronaldo tan Serie A goal hmasa khung theihna hun tura ngaih a ni - tlarhma laiah nge mual sir lamah hun hman tir a nih dawn erawh a chiang lo.

Chance vawi 23!

Premier League entuten zingah Manchester United tana Ronaldo ropui zia sawi nawn a ngai lo, Portugal captain-in Real Madrid tana goal thun khawl a nihna pawh khawvel hriat a ni. Kum 33 mi ni tawh mah se season liam ta khan inelna hrang hrangah goal Spanish club tan match 44 aṭangin goal 44 a la khung thei, hmatawng hlauhawm chungchuang bik a la ni chiang hle.

Mahse, nipui laia Turin pantu hian a club thar tan league match thum a khelh tawhah goal a la khung miah lo. Portuguese forward hian tun season chhungin goal khung theihna hun (chances) vawi 23 ngawt a nei tawh, European league lian panga zingah goal khung si loa 'chance' ngah ber a ni hial!

Italian manager Allegri-a'n Ronaldo hi tlarhma laiah a dah tlangpui a, bench aṭanga Mario Mandzukic a rawn luh chinah mual sirah a tawlh ṭhin a, Croatia international striker hlui hian lakah Sassuolo bul a ṭan a nih chuan, tun hma lama a khelh thiamna ang chiahin Ronaldo hi a sirah zalenna zau zawk pek a nih a rinawm.

A goal dawn?

Ronaldo-a'n Juventus tan goal la khung lo mah se, 'Ballon d'Or vawi nga dawng tawh hian goal a khung thuai ang' tih chu Allegri ngaihdan a ni. Italian manager chuan, "Ringhlel suh u, a thiamna leh theihna kha a theihnghilh lo chiang, fans lawmna chu a siam dawn kawp mai," a ti.

Serie A chungchang sawi zuiin Juve manager chuan, "Player tinin goal khung an chak a, chutih rualin Serie A-ah chuan striker pawhin goal an khung ṭeuh ngai lo. A tlangpui thuin goal khung hnem ber hian goal 27 ve bawr an nei ṭhin, league danga goal 40 chuang ang kha chu a harsa a ni.

"Goal khung a awlsam loh vang hian khawvela league harsa ber tihna chu a ni chuang lo. Mahse, Italy-ah chuan team tin hian goal ven dan kan thiam a, a bik takin box chhunga inven hi kan ngai pawimawh. Manager tin hian an khelhpui tur hneh dan bakah inven dan hi an zir uluk zual ṭhin hle a ni," tiin a sawi.

Nomawi chu

La Liga leh Premier League nomawi chawi tawh Ronaldo awm hma pawhin Juventus-in a zawnin season ruk chhung Serie A nomawi an chawi thei, ani an neih belh hnuah phei chuan 'bel chhunga sa' ang maia ngaih a ni. Match thum an khelh tawh china chak vek awm chhun an ni - match hnihah Fiorentina chuan point ruk an ni bawk.

Mahse, season hmasa khan Allegri nau ten awlsam takin nomawi an chawi mai bik lo. Napoli nen an inel tawh hle a, match hnuhnung pahnih chauh a awm tawh thlengin champion tur zawk a chiang lo; European league lian panga zinga champion tur chian har berna a ni hial. Napoli hian Carlo Ancelotti an nei tawh a, team inthuam ṭha Inter Milan leh AS Roma te pawh elpui tham an ni ang.

Season hmasa pahnihna Napoli hian zanin dar 9:30-ah Fiorentina an mikhual dawn a, dar 6:30-ah Inter Milan chuan an khelmual hman thiam San Siro-ah kai thar Parma an mikhual dawn bawk.