Grand Slam-ah Seeded player 32 awm chhunzawm dawn

Tennis inelna lian leh ngaihhlut ber Grand Slam-ah mipa leh hmeichhe player 32 te seeded an ni chhunzawm dawn, thuneitu sang Grand Slam Board chuan season tharah an dan pangngai an hman chhunzawm tur hi an tichiang tawh.

Tun hnaiah sawi a tam a, kalphung thlak duh vangin rawtna hran pawh a awm. Kalphung pangngai anga player 32 seeded ni ṭhin chu 16-ah tih tlem ni se, player langsar ṭhenkhat chu round hmasa lamah an inhmachhawn thei ang, hei hian inelna a tihmuhnawm zual tura ngaih a ni.

Mahse, Grand Slam Board hian ngun takin an ngaihtuah phawt a, player ṭhenkhat bakah TV lama an chhuahchhawnna te nen inbiakna an neih hnuah an kal dan pangngai a kal chunzawm rih turin thu an ti tlu, seeded player 32 an awm chhunzawm dawn tihna a ni.

Season khat chhungin Grand Slam tournament pali - Australian Open, French Open, Wimbledon leh US Open te neih ṭhin a ni a, inelna buatsaihtu lamin seeding siam chungchangah thuneihna an nei. A tlangpui thuin ATP leh WTA ranking mila siam ṭhin a ni, tournament ṭhenkhatah erawh player hlawhtlin tawhna leh an dinhmun a zirin siam rem ṭhin a ni bawk.

Kumin chhunga major tournament hnuhnung ber US Open-ah khan mipa leh hmeichhe world number 1 Rafael Nadal leh Simona Halep te chu seeded pakhatna pek an ni.