Fiahna hmasa paltlangtu Liverpool

September 15, Vanglaini chhuakah, "Liverpool tan fiahna hun a thleng ta," tih a ni a, chu fiahna chu Jurgen Klopp-a naute hian zo takin an paltlang.

Inrinni zan khan Liverpool hian an mikhualna ramah Tottenham Hotspur chu 2-1 in an hneh a, league match nga an khelh tawhah an la chak vek - kum 1990 hnua Reds-in league season an ṭan ṭhat ber ṭum a ni.

Champion lai Manchester City an awm mai mai bik lo a, an mikhual Fulham chu 3-0 ngawtin an sawp. Mahse, Pep Guardiola naute hian Wolves an lo inhnehtawkpui tawh avangin Liverpool an la phak chuang lo.

Chelsea leh Liverpool chu tun dinhmuna la tlawm miah lo awmchhun an ni a, season tawpah anni pahnih leh City hi champion tura inum ber an nih chhunzawm zel a nih pawhin a mak lo ang.

Fiahna chu
Wembley Stadium-a in­khel­ah ṭan tirh phat aṭangin Liverpool an chungnung zawk a, Sadio Mane leh Roberto Firmino te thiamna chu Spurs talbuai chhan ber pakhat a ni.

Minute 39-na lekah Liver­pool tan Georginio Wijnaldum chuan khualmuala a Premier League goal hmasa ber a khung a, Wembley Stadium thawm a reh hle. Liverpool-in inkhel an thunun chhunzawm a, second half minute kuanaah Roberto Firmino chuan an goal hnihna a khung.

Brazilian forward hian beisei angin season bul ṭan lo mah se Leicester City leh Spurs lakah goal a khung leh ta a, Klopp-a'n a dah 'san' chhan hmuh a harsa lo. Firmino hi Spurs defender Jan Vertonghen nen ball an inchuhna lamah a mitah hliam a tuar a, inkhelh zawhah ngaihtuahawm a nih loh thu a sawi.

Reds defender Andrew Ro­bertson leh Spurs forward Lucas Moura ten woodwork an tih per ve ve a, hun pek belha Erik Lamela goal khung erawh London club ben harh nan a tlai mah mah tawh.

Klopp-a hlim
Liverpool boss Jurgen Klopp chuan, "Ka nauten an khel ṭha takzet a ni. Tottenham hi khawvela football club ṭha ber pawl an ni a, international break zawh hlima anni lenchilh a, khatianga khelh kha chu thil awlsam a ni lo.

"Tlarhnungah kan khel ṭha a, a hma lamah chuti tho a ni bawk. Result khan kan khelh dan a la paw chhuak zo lo zawk a ni. A tawp lamah khan tlem chuan kan hlauthawng ve ngei a, mahse vawiin anga kan khelh ṭhat niah chuan sawisel tur zawn ka tum lo," a ti.

Tottenham manager Mau­ricio Pochettino chuan, "Han lunghnur vak theih pawh a ni lo. Kan game khan Premier League hautak zia a pholang a, league bul ṭan ṭha em em mai kan hmachhawn bawk a ni.

"Old Trafford-a Manchester United kan hneh ṭum khan hmasawnna tur kan la neih thu ka sawi a, ka thusawiah khan ka la ding reng a ni," a ti a, hmasawnna tur an la neih thu a sawi.

City an tho
Manchester City-in Arsenal leh Huddersfield an hneh hnuah tawlhthlu zeuh mah se insiamṭha turin hun an duh rei lo. Newcastle United an hneh leh nghal a, Inrinni zan khan an mikhual Fulham chu 3-0 ngawtin an sawp bawk.

City tan Leroy Sane chuan tun season-a league match bul a ṭan hmasak berah minute khat leh second 36 chhungin goal a khung nghal a, David Silva leh Raheem Sterling ten goal khat ve ve an khung bawk.

Pep Guardiola chuan kum 22 mi Sane fakin, "Leroy theihna hi engtiklaimahin kan ringhlel ngai lo. Season hmasaah khan a ṭhat zia chu kan hmu fo tawh a, zaninah chumi bawk chu min hmuhtir leh ta a ni," a ti.

City boss chuan inkhel thlirkir nghalin, "Kan chance neih dan aṭang ringawt kha chuan goal thum aia tam khung thei tur kan ni. Goal khung kan zir a ngai a ni," a ti a, Fulham chuan season ṭha tak an hman a rin thu a sawi bawk.