Ibra tan goal 500

LA Galaxy striker Zlatan Ibrahimovic chuan nimin zing khan Major League Soccer-ah a career-a a goal 500-na ropui zetin a khung a, football la khel mek zinga goal 500 khung tling thei Lionel Messi leh Cristiano Ronaldo te nen huang khatah an awm ta.

Kum 36 mi striker hian ram leh club tana a goal 500-na khung tur hian spinning backheel hmangin a volley goal a, striker satliah tana khung ve theih chi a ni lo - chak nan erawh a tawk lo a, Toronto lakah 5-3 in an tlawm.

Swedish striker ropui chuan, "Ka goal 500-na ka khungna team angin an hre reng tawh dawn a, Toronto ka lawmpui em em a ni," a ti daih!

Ibra hian March khan Manchester United aṭangin USA club hi a zawm a, match 18-a inlanah goal 17-a khung sakna chiah a ni.

Sweden tan match 114 khela goal 62 khungtu striker hian Malmo, Ajax, Juventus, Inter Milan, Barcelona, AC Milan, Paris St-Germain, United leh LA Galaxy tan khel tawhin match 747-ah goal 438 a khung sak.