United chhandamtu De Gea

Manchester United-in Burnley an hneh hnuah Vicarage Road tlawhin Watford lakah football hmuhnawm an khel chhunzawm. Amaherawhchu, 2-0 a hma hruai hnuah mual neituin siphurh an sut ṭhen avangin hun tawpa chhandamtu chu David de Gea a ni a, Spanish keeper zarah Jose Mourinho hote 2-1 in an chak hram.

Inrinni zanah Romelu Lukaku chuan minute 35-naah Luke Shaw aia lut Ashley Young-a cross chu a su lut a, minute thum hnuah Chris Smalling-a'n striker class bik khung dan ṭhinin a chest thlak hnuah a volley goal chiang hle.

United-in first half an thunun a, Paul Pogba-a'n midfield-ah ro a rel a, inkhel hmuhnawm thlir tur awmin Watford keeper Ben Foster a rim hle. Second half-ah erawh Watford an insiam ṭha a, first half-a David de Gea hna siamtu Troy Deeney leh Abdoulaye Doucoure ten United an chhaih buai hle.

Minute 65-naah Hornets-in United tlarhnung an ṭhiah hnuah Andre Gray-a'n chiang zetin an pet goal. A tawp lamah Watford khel a nung lehzual a, Nemanja Matic chuan Will Hughes a tihtluk vangin hnawhchhuah a ni.

Hemi aṭanga an freekick hmuh chu Christian Kabasele chuah tauh fuh mah se Spanish keeper De Gea-a'n a dang. Watford-in tun season-a vawi li an chak hnuah an mualah an tlawm.

Manchester United-in Nilaini zan dar 12:30-ah Young Boys hmachhawn turin Switzerland khawpui Bern an tlawh ang a. Kartawpah Wolverhampton Wanderers an mikhual ang.