Saul 'Canelo' Alvarez a dingchang ta

Round kuanaah, ring sirah nu pakhat a lo ṭawngṭai mawlh mawlh a, Saul 'Canelo' Alvarez 'Nu' a ni. Fighter ropui zawk nih inchuha a fapa Saul 'Canelo' Alvarez leh Gennady Golovkin inhnek lai en ngam loin a ṭawngṭai - a ṭawngṭai chhanna erawh Nu tan chuan duhthusam a ni.

Boxing ngainatu ten an nghahhlelh Saul 'Canelo' Alvarez leh Gennady Golovkin inhnek chu nimin khan a thleng ta a, Mexican fighter Saul Alvarez chu chak zawkah puan a ni.

Judge pakhatin fighter pahnih hi 114-114 a inhnehtawkah puang mah se judge pahnihin Saul hi 115-113-a chak zawkah an puang ve ve a, WBC leh WBA world middleweight champion a ni ta.

Golovkin tan vawi 40 inhnek a hmachhawna a vawi khat tlawmna a ni a, "Middleweight kawnghren zawng zawng kawl ka duh avangin WBO champion Billy Joe Saunders hmachhawn leh ka duh ang," ti mah se a beiseina a thamral a, a kawnghren neihsa pahnih pawh a hloh ta zawk.

Final round!

September 2017-ah boxer pahnih hi sawisel hlawh takin an lo inhnehtawk tawh a, an intawn hmasak ṭum hian mi tam takin Golovkin hi chak zawkah an ngai.

Mipui beisei angin an in fight nawn ta ngei a, Golovkin aiin Saul Alvarez-a'n hmasawnna a ngah zawk niin a lang. Mexican fighter a che rang a, huaisen takin attacking game a khel a, Golovkin hnek fuh hnem hrim hrim a tum.

Fighter pahnih aṭangin 'uppercut' hmuhnawm tak tak hmuh tur a awm zeuh zeuh a, boxer pahnihin an hnek na lo ni loin an tuar a chhel ve ve zawk niin a lang a, fight hmuhnawm tia sawi loh rual a ni lo.

Canelo chuan, "Ka coaching staff ten round tawp bernaah khan ka chungnun zawk chuan a chak zawk ka nih theih thu an sawi a, an sawi ang ngeiin ka ti ta a ni," a ti.

Kan ti leh ang!

Golovkin fan-te result-ah an lawm lo a, fighter pahnih hi intawng leh ngei se an duh - an beisei ang an hmu leh mai thei. Canelo chuan Kazakhstan boxer hmachhawn leh a hnial loh thu a sawi.

Kum 28 mi fighter chuan, "Mipuiin kan fight hi an hmu leh duh a nih chuan kan ti leh ang. Kan in fight leh ngei ang tihah hian rinhlelh tur a awm lo," a ti a, Golovkin hneh nawn leh 'sak' a chak.

Golovkin chuan, "Zaninah khan tuin nge hnehna chang zawk tih hi ka sawi tur a ni lo. Endiktuten Canelo chu chak zawkah an puang vek tawh a ni. Mahse, ani ai chuan ka fight ṭha zawkah ka ngai a, a vawi thum nana inhmachhawn leh hi ka duh a ni.

"Canelo te nen kan in be leh ang a, in fight leh ngei kan tum ang," a ti a, Billy Joe Saunders lam a hawi tawh lo a, a kawnghren hloh tak neih let leh ngei a duh.