Chawnpui leh Durtlang an champion

ADBBA Cup Zalena Fanai Memorial Trophy chu Zirtawpni zan khan Hawla Indoor Stadium-ah khelh a ni a. Mipa final-ah Chawnpui BC-in Republic VR4 chu 85-78 a lehthalin an champion pui a, hmeichhe final-ah Durtlang Mohicans-in phuba lain LB Associates Bungkawn chu 49-37 in an hneh ve bawk.

Chawnpui an ṭang thei

Mipal final-ah Repub­lic VR4-in bul an ṭan ṭha a, quarter hmasa berah 21-14 in Chawnpui lak­ah hma an hruai nghal. Amaherawhchu quarter tinah Chawnpui an insiam ṭha a, quarter thumna a zawh chuan an inthlauhna hi point thum chauh a ni tawh.

Zodina te chet ṭhat zarah Chawnpuiin quarter tawp ber an thunun a, 28-18 zet niin quarter tina an point luh belhkhawmah 85-78 in hnehna an chang.

Durtlangin phuba la

Season Opening tour­nament-ah LB Associates Bungkawn-in Durtlang Mohicans hnehin an champion a, team pahnih hi ADBBA Cup-ah an intum nawn.

LB Associates-in quarter hmasa berah 13-11 in hma an hruai a, Durtlang Mohicans an che ṭha chhunzawm. Mohicans tan Puii leh Tebawihi ten point 14 ve ve an score a, quarter thumna bika 12-5 an chungnungna hmangin dinhmun ṭha zawkah an ding a, 49-37 in an chak.