Chawnpui point hmuhna Thanga freekick
Ball pet thiam bik an awm a, an thawhrim tel chiah hian a famkim ṭhin. Chawnpui FC-in Hualngohmun tlangval Vanlalthanga freekick hmangin Ramhlun North laka an siphurh sutna a khung a, MPL kaithar in point an hlawhchhuah phah bawk.
Zirtawpni zan inkhelah Ramhlun North forward Lalliansanga'n keeper Lalmalsawma Hmar tihsual nang chingin goal hmahruai a khung. Coach F. Lalrozara hote chak zawk tura ngaih ni mah se huaisen takin Chawnpuiin an bei let a, 1-1 in inkhel a tawp.
Chawnpui a par?
MPL kaithar Chawnpui FC-in champion lai Chhinga Veng hneh loin bul anṭan a, khelmualah erawh fak tlakin an khel ṭha. Ramhlun North nen an inkhelh ṭum pawhin an hlau bik lo a, amaherawhchu keeper Malsawma'n box pawn aṭanga a ball pet tur chu ti per sualin Ramhlun North forward Notea zawnah chiah tlain Durtlang tlangval hian goal ruakah a pet lut.
Ramhlun North-in goal an khung hnuah an dinhmun an siam ṭha thei lo a, first half-ah Thanga freekick pet keeper Liansangpuia'n ban chatin a man a, ball thar Nivia Antrix a kal chak tih leh Hualngohmun tlangvalin freekick a pet thiam tih an hrechungin an fimkhur phah lo.
Minute 63-naah ding lam kilah Chawnpui lamin freekick an hmu a, Thanga'n a ke vei lamin goal kilah tak a dah a, goal mawi bik a ni. Chawnpui hian point thum hlawh chhuak lo mah se hun thlawp thlenga a nawrtu an nih avangin an par ṭan tiin a sawi theih.
Inkhelh banah Chawnpui winger Thanga chuan, "Team training zawh hian Hualngohmunah keimah chauh pawhin ball ka pet nasa hle. Nivia Antrix hi a dang hlak a, chuvangin inzir nasat a ṭul a ni," tiin a thawhrim thu Vanglaini a hrilh.
Fixture ngaihnawm
Ramhlun North-in beisei angin MPL7-ah bul an ṭan lo a, match hnih aṭangin point khat chauh an hlawh chhuak. Coach Rozara chuan, "Insiamṭhatna tur kan la nei a, hma kan sawn zel ka beisei," tiin a sawi a, champion lai Chhinga Veng an hmachhawn dawn avangin hmasawn an mamawh lehzual.
Round 3-ah Ramhlun North hian Chhingcows an hmachhawn tawh a, team pahnih hi first division-a awm dun ṭhin niin MPL-ah pawh an tling rual. Tun dinhmunah Chhinga Vengin nomawi chawi tam zawk mah se Lalsangzuala Hmar-in a enkawl hnuah pawh Chhingcows hian MPL Qualifier aṭang tawhin Ramhlun North hi an la hneh thei lo.
Team Dinhmun
# Team Pld W D L GF GA GD Pts
1 Chhinga Veng FC 2 2 0 0 3 1 2 6
2 Electric Veng FC 2 2 0 0 3 1 2 6
3 Chanmari FC 2 1 1 0 4 2 2 4
4 Mizoram Police 2 1 0 1 1 1 0 3
5 Aizawl FC 2 0 1 1 3 4 -1 1
6 Chawnpui FC 2 0 1 1 1 2 -1 1
7 Ramhlun North 2 0 1 1 1 3 -2 1
8 Bethlehem VT 2 0 0 2 1 3 -2 0
Chawnpui FC 1 - 1 Ramhlun North FC
CFC : Vanlalthanga 63'
RNFC : Lalliansanga 35'
MoM : Lalliansanga, RNFC
48% Ball Possession 52%
18(9) Shots (On Target) 12(5)
0 Woodwork 0
4 Corners 7
3 Offsides 7
2 Yellow Card(s) 1
0 Red Card(s) 0