Mizo telna India U16-in Malaysia an thleng

September 20 aṭanga khelh ṭan tur AFC Under 16 Championship khel tur India chuan inelna neihna hmun tur Malaysia an thleng fel der tawh a, an inbuatsaih ngawrh hle.

India U16 coach Bibiano Fernandes chuan, "Malaysia-ah hian a hmain kan kal tawh chungin inelna neih a nih hmain kan nauten a boruak lo tem lawk se kan duh a, a ram dinhmun, sik leh sa thlenga an lo bel sa hi a ṭha dawn a ni," tiin an kal hma chhan a sawi.

AFC U16 Champion-ship-a semifinal lut chin hian qualifier khelh ngai loin 2019 FIFA Under 17 World Cup khel turin an tling chiang dawn a, India-in nikumah a thlengtu nihna avangin he inelna hi an khel tih loh chu World Cup eng level-ah pawh India a la inpetkai ngai lo.

Blue Tigers naupang rual hi Group C-ah Iran, Vietnam leh Indonesia te nen dah an ni a, group tina a sang pahnih ṭheuh hian last 16 an lut ang.

AFC U16 team-ah hian Mizo rawlthar pali Serchhip midfielder Eric Remruatpuia Chhangte, Lunglei goalkeeper Lalbiakhlua Jongte, Lengpui midfielder Lalrokima leh Armed Veng rawlthar Lalchhanhima Sailo te an tel a ni.