UEFA chungah Bale a lawm lo!

Real Madrid forward Gareth Bale chuan UEFA goal of the season thlanchhuah tur zinga a goal khung a tel ve lo chu mak a tih thu a sawi a, "UEFA panel te kha hriat an ngai a ni, an duhthlan dan en khan an hna aṭanga ban an duh a ni ang," a ti!

Champions League final-ah Bale hian overhead kick hmangin Liverpool lakah mawi zetin goal a khung a, mahse UEFA hnuaia inelna zinga goal khung mawi thlan tura chhawpchhuah 11 zingah pawh a tel lo.

Bale chuan, "Ka goal khung kha engtinnge thlanchhuah 11 zingah a tel loh ka hrethiam lo," a ti a, goal mawi bera thlan tak Ronaldo goal chungchang erawh,"Keia lo sawi tur a awm lo," tiin a sawi thung.

UEFA goal of the season-ah hian Ronaldo goal khung thlan a ni a, Portuguese forward goal hi tuna a khelhna Juventus laka overhead kick hmang veka a khung kha a ni.

Zinedine Zidane hnuaia hmun pawimawh chang phak lo Bale hi Real coach thar Julen Lopetegui chuan an player pawimawh a nih tur thu season ṭan hmain a sawi a, kum 29 mi forward hian a pu thar rinna a ti hlawhchham lo.

Tun season-ah Real tan league match an khelh tawh zawng zawngah inlan kim vekin match li a khel a, goal thum a khung tawh.