Sarri-a'n Hazard a ring tawk

Chelsea manager Maurizio Sarri chuan a player pawimawh Eden Hazard a ringtawk a, Belgian forward hian tun season-ah goal 40 a khung tlin theih a rin thu a sawi!

Kum 27 mi forward hian Inrinni zan khan Cardiff City lakah hattrick a siam a, tun season-ah Blues tan match nga khelin goal nga a khung tawh.

Sarri chuan, "Hazard nen kan inbia a, season khatah goal 40 a khung theih thu ka hrilh. Heti zat goal khung tur hian hmasawn ngaihna lai erawh a nei ngei a, mahse chu chu a ti thei a ni," tiin a player a ringtawk hle.

Hazard hian kum 2012 khan Chelsea hi a pan a, inelna hrang hrangah match 305 khelh sak tawhin goal 94 a khung sak a, season khata goal 20 khung tlin a la nei lo.

Lille tana a khelh lai khan season khata a goal khung hnem ber tawngin goal 22 a khung a, Chelsea a pan hnuah chuan 2014-15 kha season khata goal a khung hnem ber ṭum niin goal 19 a khung.

Season hmasaah khan inelna hrang hrangah goal 17 a khung a, league-ah goal 12 khungin top scorer ni ta, goal 32 khungtu Mohamed Salah a phak lo hle - Salah hian inelna hrang hrangah goal 44 a khung.

Sarri enkawlna hnuaiah Chelsea hi Premier League hmahruaitu an ni mek. Champion lai Manchester City aiin point hnihin an sang zawk a, goal difference-ah Liverpool-in an phak lo bawk.

Italian coach chuan hemi chungchang hi sawi nghalin, "Hmasawnna tur tam tak kan la nei a, ka tum ber chu kum khat emaw thla 18 chhunga England-a team ṭha ber nih hi a ni.

"Ka ngaihdanah chuan Liverpool leh Manchester City hi keini aiin an ṭha zawk a ni," a ti a, team ṭha ber ni tura an khum ngai zingah Manchester United leh Arsenal a sawi tel lo.