Momota kutah Japan Open nomawi

Pathianni khan badminton inelna pakhat Japan Open chu khelh zawh a ni a, khawtual tlangval Kento Momota chuan Thai rival Khosit Phetpradab lakah 21-14, 21-11 a hnehna changin a champion. Hmeichhe inelna lamah Olympic champion Carolina Marin chuan a nomawi kawl lai humhim turin Nozomi Okuhara chu 21-19, 17-21, 21-11 in a hneh bawk.

Kum 24 mi Kento Momota hi Japanese mipa zingah Japan Open tilte la thei hmasa ber a ni. A champion hnuah thu sawiin Momota chuan, "Kan inkhelh chhung zawng khan keimah leh keimah ka infuih reng a, point dang ka mamawh thu hlir ka ngaihtuah a ni.

"Infiamna zin kawngah hian harsatna chi hrang hrang ka lo tawk tawh a, khangte vang khan ka hnual ngai lo. Tunah chuan ka tan kawl a eng ve ta," tiin a sawi.

Momota hi badminton player ṭha tak a ni a, Rio Olympic-ah khan an ram team aiawh thei tur pawh a ni. Mahse, dan phal lohin pawisa khelhna hmunah a kal tih hriat a nih avangin ram ai a awh thei lo, kum khat chhung hrem a ni bawk.

Mahse, World Championship leh Asian Games-ah ropui takin a rawn kir a, inelna lian pahnihah hian gold medal a vaw chhuak. Tun ṭumah ropuina a chan zui leh tak avangin khawvel player hlauhawm leh beisei awmberte zinga mi a ni mek.