Hamilton a sang fal zel
Lewis Hamilton chuan Pathianni zana tlan zawh tak Singapore Grand Prix-ah hnehna a chang a, Mercedes driver hian world championship hmahruaitu a nihna chu point 40 zetin a sawh nghet ta - tun season chhungin intlansiak paruk a la awm ang.
Misano World Circuit Marco Simoncelli-a intansiakah pole position aṭanga bul ṭantu Hamilton-a'n buaina liantham tawk loin hnehna a chang thei, amah hnaih bertu chu Red Bull driver Max Verstappen niin; championship lama Hamilton elpui ber Sebastian Vettel chu pathumnaah a thleng thung a ni.
Britain tlangval hian Formula 1 car a khalh chinah vawi 69 hnehna a chang tling ta a, tun season chhung bikin vawi sarih a chakna a ni bawk. A tan Singapore Grand Prix-a hnehna chan zawn hi a hlu a, an elpui Ferrari leh Red Bull chunga a chuang thei hi chanchin lawmawm a ni bawk.
World champion vawi li ni tawh Hamilton chuan, "Kan hriat ṭheuh angin tun inelna bikah chuan Ferrari hi an ṭha dawn tih kan chiang a, chu mi hneh thei tur chuan ruahmanna pawh kan siam uluk hle.
"Tlan kawng kan luh tirh aṭangin team chhunga hnathawk zawng zawngin an tih tur dik takin an ti vek a, kan zavaia hnathawh ṭhat rah chu a tawpah kan seng ta a ni. Hnehna chan hi ka tan chauh ni loin kan zavaia tan a ni," tiin a sawi.
Ferrari an fuh lo
Season hmasa Singapore Grand Prix-ah khan Vettel, Verstappen leh Kimi Raikkonen te a tir lamah an chesual vek a, an tan chanchin chhe tak a ni. Ferrari lamin an tihsual siam ṭhat an tum a, qualifying round an tlan chinah chuan an car pawh a chak ṭha hle. Mahse, pitstop an hmang ṭha lo a, an elpui dangte aiin hun an hman rei hret ṭhin avangin a tawpah chuan a dinhmun hniam zawkah an din a ngai.
German tlangval Vettel chuan, "Hun ṭha kan nei thei lo, ṭum dang ang bawkin kan tlai leh a ni," tiin a team lak aṭangin a duhthusam ang puihna a dawn ṭhat loh thu a sawi. Tun hnaiah chuan Vettel hi Hamilton-a elpui ber a ni a, mahse season hmasa ang bawkin a phak lo leh deuh dawn niin a lang.
Ferrari chief Maurizio Arrivabene pawhin an chetṭhat tawk loh thu a pawm. Arrivabene chuan, "Lap hmasa ber tlan a nih aṭangin a hmasa berah kan awm lo a, thil a harsa tawh ṭhin a ni. Intlansiak pumpui kan thlir a nih chuan kan tlan chak tawk lo, hun paih zeuh zeuh kan nei bawk," a ti.
Khawvela car intlansiakna sang ber hi chawlhkar hnih chhung an chawl phawt dawn a, chumi hnuah Russian Grand Prix an tlan ang. Sochi intlanisak zawhah hian Japanese Grand Prix an tlan leh ang. Intlansiak vawi khatah pakhatna dinhmun luahtu hian point 25 ngawt a hmuh theih avangin champion tur a la chiang lo.
Singapore Grand Prix Results
# Driver Ram Team
1 Lewis Hamilton Gbr Mercedes
2 Max Verstappen Hol Red Bull
3 Sebastian Vettel Ger Ferrari
4 Valtteri Bottas Fin Mercedes
5 Kimi Raikkonen Fin Ferrari
6 Daniel Ricciardo Aus Red Bull
7 Fernando Alonso Spa McLaren
8 Carlos Sainz Spa Renault
9 Charles Leclerc Mon Sauber
10 Nico Hulkenberg Ger Renault
Driver Championship Table
# Driver Ram Team Points
1 Lewis Hamilton Gbr Mercedes 281
2 Sebastian Vettel Ger Ferrari 241
3 Kimi Raikkonen Fin Ferrari 174
4 Valtteri Bottas Fin Mercedes 171
5 Max Verstappen Hol Red Bull 148
6 Daniel Ricciardo Aus Red Bull 126
7 Nico Hulkenberg Ger Renault 53
8 Fernando Alonso Spa McLaren 50
9 Kevin Magnussen Den Haas 49
10 Sergio Perez Mex Force India 46