Ronaldo-a'n a pet goal
Goal khatna a khung hnu lawkah goal hnihna hmuh tur a awm zui lehnghal a, kum 33 mi a nih hnuah pawh Cristiano Ronaldo-a'n goal khung châkin a la tuihal reng. Portuguese forward hian a club thar Juventus tana match thum chhung goal a khung loh hnuah Pathianni zan khan Sassuolo 2-1 a an hneh ṭumin goal hnih a khung.
Ronaldo goal khung zanah Juventus duhthusam vekin thil a kal lo a, substitute Douglas Costa chu Federico di Francesco chil a chhak khum vangin hnawhchhuah a ni a. Brazilian winger hian a lua tauh a tum bakah nghawk tum anga a lan avangin hremna na tak a hmachhawn ang.
An la nghak zel
Juventus-in Real Madrid aṭangin pound maktaduai 99.2 in Ronaldo an lalut a, an player lakluh hi a hrawl em avangin Italian champion-in an club legend Gianluigi Buffon chhuah vanga mittui far pawh lawmna mittuiin a thlak nghal.
Italian champion hian Ronaldo hnen aṭangin goal an beisei a, Portugal captain pawhin goal khung tumin a theihna zawng zawng chhuah mah se Italy ramah goal khung a awlsam lo.
Ronaldo hian Chievo, Lazio leh Parma lakah a khung thei lo a, Sassuolo lakah pawh minute 45 chhung khung thei loin goal khung tumin a ṭang ulh tih a lang. Amaherawhchu, Juventus leh Ronaldo ṭantuten goal luh hun an nghak zel.
An nghak chhuak ta
Vanglainiin 'Ronaldo goal khung hun?' tiin kan ziak lawk a, chhan dang a tam lo. Ronaldo anga theihna nei sang player-in goal khung loin hun a hmang rei thei lo.
Second half minute nganaah corner aṭanga ball kal chu Sassuolo player Gianmarco Ferrari chuan an goal ban a tauh per a, Ronaldo chuan yard ruk lek aṭangin goal ruakah a khung. Juventus forward hian hei aia goal ropui hi a khung fo tawh a nih pawhin minute 320 hnua a goal hmasa berna a nih miau avangin a lawm tih a cheziain a tilang.
Goal hnihnaah erawh 'class' a lang ta chiah a, counter attack hmanga an vuak let hnuah Emre Can hnen aṭanga a ball hmuh chu keeper tana dan theih loh turin a goal kilah lei hrulin a pet lut a, hattrick siam theihna tur hun ṭha erawh a bawhpelh thung.
Juventus erawhin awlsam takin hnehna an chang zui lo a, Sassuolo tan Khouma Babacar chuan injury time-ah goal khat khungin hemi hnu hian Costa chu hnawhchhuah a ni bawk.
Ronaldo a lawm
Inkhelh banah Cristiano Ronaldo chuan, "Ka lawm takzet. Ka chungah beiseina a sang em em a, an mit tluk zo turin ka thawkrim a, a khelhpuiten min pui ṭha bawk. Goal khung hi ka duh a, chutihrualin a pawimawh hmasa ber chu hnehna chang hi a ni," tiin a lawm thu a sawi.
Ronaldo chuan sawi chhunzawmin, "Champions League hi inelna zawng zawnga ka ngainat ber a ni a, kan vanneih ka beisei. Kan group awmna harsa mah se ka phur tawh a ni," tiin Champions League chungchang a sawi a, Juve hi Manchester United, Valencia leh Young Boys nen group H-ah an awm ho a, naktuk zan hian match hmasa berah Valencia an tlawh ang.
Juventus coach Massimiliano Allegri chuan, "Match thum chhung khan a khung teuh ṭhin hle. Football-ah chuan thawnthu kal dan hi a mak ṭhin a, goal hmasa ber kha a zawnah a tla fuh a, goal hnihna erawh a ṭha takzet a ni," tiin Ronaldo goal khung hun a inherchhuah ve hrim hrim thu a sawi.
Ronaldo nge nge
660 Goals - Ronaldo hian club leh ram tan goal 660 a khung a, amah hnaih bertu Lionel Messi aiin goal 39 ngawtin a tam a, Argentine forward hian goal 621 a khung tawh. Tuna khel lai player-ah goal 500 khung tling thei hi anni pahnih bakah Zlatan Ibrahimovic chiah an awm.
400 Goals : Ronaldo hian a bul ṭanna Sporting Lisbon tan league-ah goal thum a khung hman a, Manchester United tan goal 84 khung lehin Real Madrid-ah goal 311 zet a khung. Juventus tana goal hnih a khung leh takah chuan league-ah ringawt goal 400 a khung tling.
A nghak rei mah se : Season liam ta khan La Liga-a goal hmasa ber khung turin shot vawi 28 a nei a, kumina Serie A goal hmasa ber hi shot vawi 27-naah a khung a ni. Inhliam vangin season ṭantirh lamah a inlan lo a, season tawpah erawh match 27-ah goal 26 a khung pha tho. Match 27 chauh khel chungin league bika season liam taa Serie A top scorer Mauro Icardi leh Ciro Immobile te a phak lohna chu goal thum chauh a ni bawk.