Miami Heat-ah Wade a kir dawn

NBA champion vawi thum ni tawh Dwyane Wade chu season thar atan Miami Heat-ah a kir leh dawn a, kum 36 mi hian basketball inelna sang berah season 16 a hmanna tur niin, a hun hnuhnung a ni nghal bawk ang.

American shooting guard hi Heat tan chuan player ṭha chungchuang bik a ni a, an club-ah hian point, assist, steal leh game khelh hnem lamah record nei ṭha ber a ni vek. Wade chuan, "Ka hun hnuhnung hmanna tur hi duhthusam a ni, he club tana theihtawp chhuah leh hi ka thil chak ber a ni," a ti.

Wade hian 2016-17 season khan an khaw club Chicago Bulls tan a khel a, chumi hnuah Miami tana a khelhpui tawh LeBron James awmna Cleveland Cavaliers lamah a kal.

An player hmanthiam sa lalut turin Heat hian pound maktaduai 1.84 vel an hmang tura ngaih a ni a, tun kar tawp lamah inremna an siam fel hman ang. Regular season thara an match hmasa ber atan October 17 hian Orlando Magic nen an inkhel ang.