Nadal hmaah Medvedev a ding dawn

Rafael Nadal leh Daniil Medvedev ten Australian Open 2022 nomawi an inchuh dawn. Spanish star hian Grand Slam nomawi 22-na chawi a tum dawn a, a tihlawhtling thei a nih chuan mipa player zinga major title la hnem ber a ni ang.

Mipa final hi Pathianni tlai dar 2:00-ah khelh a ni dawn, tennis ngaina tute chu Nadal ṭantu a ni emaw, a khingpui world number 2 Medvedev ṭantu zawk an nih pawhin Rod Laver Arena lam an hawi ang - inkhel hmuhnawm bik chhawpchhuah a ni dawn.

Inkhel hmuhnawm
Nimin semifinal inkhel hmasa zawkah Nadal hian Matteo Berrettini chu 6-3 6-2 3-6 6-3 in a hneh, hnehna chang tur hian darkar hnih leh minute 55 chhung hun a hmang a, a service vawi khat chauh hlohin harsatna lian tham a tawk lo.

Nadal hmachhawn tur zawnnaah, seeded pahnihna Daniil Medvedev chuan darkar hnih leh a chanve chhung lekin Stefanos Tsitsipas chu 6-7 (5-7), 6-4, 4-6, 1-6 in a hneh ve thung. Russian star hian Grand Slam nomawi pahnihna chawi turin Nadal a paltlang a ngai dawn.

Australian Open bikah chuan Nadal-a'n final a luh vawi ngana a ni a, a khingpui tur Medvedev pawhin vawi hnih a khelhna tur a ni dawn. Medvedev hi tawnhriat nei tlem zawk ni mah se, ranking sang leh seeded sang zawk a nih avangin dah hniam ngawt theih a ni dawn lo.

Nadal a hriam
Rod Laver Arena-a inkhelah a bul aṭangin Nadal a che fuh. Set khatna la turin a khingpui service vawi khat chhuhsak a tawk a, set hnihnaah pawh a tir lamah vawi hnih ngawt chhuhsak leh nghalin atan hna harsa leh hautak a awm lo.

Set thumnaah erawh Italian tlangval Berrettini-a'n thapui a thawh a, a vawi khat nan Nadal-a service chhuhsak vein set pawh a la zui. Set hnuhnung berah erawh Nadal bawk che fuhin 4-3 a hma a hruai hnuah break sak lehin a service a hum chhunzawm avangin a chak.

Darkar hnih leh minute 55 an inkhelh chhungin Nadal hi dinhmun hlauh thawn awmah a ding lo. Seeded pasarihna Berrettini khan beih let tum viau ṭhin mah se, player ṭha leh tawnhriat nei ṭha zawk a nih miau avangin Rafa a chungnung.

Pen khat a la ngai
Grand Slam champion hnem lamah Nadal, Roger Federer leh Novak Djokovic te an intluk mek, nomawi 20 ṭheuh an chawi tawh. Record thar siam thei dinhmunah a ding mek, mellung hlu bik phun tur erawhin match khat chak a la hmabak.

Semifinal a khelh dan thlir chuan Nadal hi kum 35 mi ni tawh mah se tleirawl tha za ang mai a la ni. A ball vuak a na in a dik a, a khingpuiin sir leh kil tak takah rawn pe ṭhin mah se a vaw let hman zel, a forehand na leh top spin vir tak chu player dang tan hmachhawn a harsa.

Nadal chuan, "Final chu sawi lawk theih a ni lo, tu pawh hmachhawn ni ila ka theihtawpa ka khelh a ngai," tiin a sawi. Nadal hian record thar siam a duh tih a sawi tawh a, mahse a thil tum ber erawh nuamti taka tennis khelh tawp a nih thu a sawi tel bawk.