Jerry-a goal a tawk zo lo

Mizo tlangval Jerry Mawihmingthanga'n Odisha FC tan goal hmahruai khung mah se Hyderabad lamin goal thumin an chhanglet a, Odisha tan Jonathas Christian pawhin khung ve leh mah se a tawpah 3-2 in an tlawm.

Top four inum boruak sang karah Odisha-in semifinal beiseina chhi nung turin chak ngei ngei an mamawh a, Hyderabad-in table chung ber luah chhunzawm zel turin chak ngei ngei an mamawh bawk.

Hyderabad-in inkhel an thunun zawk a, goal khung hmasa erawh Odisha an ni - minute 45-naah Jerry chuan tun season ISL-a a goal thumna khungin a team hi hma a hruaipui a, 1-0 a ni.

Hyderabad an harh zawk - second half-ah Joel Chianese, Joao Victor leh Akash Mishra ten goal khat ṭheuh khungin an chhanglet zui a, 3-1 a ni der.

Odisha tan Jonathas chuan khung ve leh mah se Real Sociedad forward hluiin goal a khung hian minute 84-na a ni tawh a, Odisha harhchhuah a tlai hret avangin an tlawm.

Ningani zan inkhelah hian Odisha tan Lalhrezuala Sailung, Isaac Vanmalsawma leh Jerry ten inkhel bul an ṭan a, Paul Ramfangzauva chu minute 87-naah luhtir a ni thung.