AFCON: Egypt nge tlang dawn Morocco?

Africa Cup of Nations pawh a hmawr an bawk hnai ta a, a thiam pariat chiah an dam ta - zaninah quarterfinal hi khelh ṭan a ni dawn a, zan dar 9:30-ah quarterfinal match hmasa ber khelin Gambia leh Cameroon an intawng ang.

Zanin dar 12:30-ah Burkina Faso leh Nigeria hnawtchhuaktu Tunisia an intawng dawn bawk a, hei pawh inkhel en tlak tak ni tura beisei a ni.

Mipui nghahhlelh bera chhal ngam erawh Pathianni zan dar 8:30-a Egypt leh Morocco inkhel tur chu a ni a, anni pahniha chak zawk tan champion beisei a ngamawm hial ang - team ṭha ve ve an ni tlat.

Pathianni zan dar 12:30-ah Senegal leh Equatorial Guinea an inkhel dawn bawk a, Senegal tan Mali hnawtchhuaktu Equatorial hi zuam sual theih an ni tih a lang.

Salah telna
Egypt chanchin sawi apianga an sawi lansarh chu Mohamed Salah neitu an ni hi a ni a, mahse, Liverpool foward hi European football angin an ram tan a ke a hmui tawk rih lo - tun inelnaah goal khat chiah a la khung!

Mak ve angreng tak chu Egypt hian tun inelnaah goal hnih chiah an la khung a, Salah leh Mohamed Abdelmonem chiah goal khungtu an la nei rih. Insiamṭhat an ngai tihna a ni.

Pharaoah (Egypt sawina) hian tlarhmaah Galatasaray forward Mostafa Mohamed leh VfB Stuttgart forward Omar Marmoush te an nei bawk a, goal hnih lek khung tur chu an ni lo.

Goalkeeper Mohamed El-Shennawy chu a malpui hliam vangin a inlan theih la beiseiawm chiah lo mah se Ivory Coast laka amah thlaktu Gabaski chetṭhatzia kan hria a, Egypt tan lungphanna tur a awmin a lang lo.

Morocco an ṭha?
Group stage match thum an khelhah Morocco an tlawm miah lo a, last 16 aṭangin Malawi an pet chhuak bawk - he team hian lehkhaah chauh ni loin, a tak ramah pawh team ṭha tak an ni, tih an pholang a, Egypt tan hneh an awlsam lo ang.

Morocco hi Chelsea forward Hakim Ziyech ko duh lo ngat ngam khawpa team induhtawk an ni ve a, coach Vahid Halilhodzic hi pal mai mai chi a ni lo ang tih a hriatthiam theih.

Tlarhmaa Sevilla striker chhuanvawr Youssef En-Nesyri awm ringawt pawh thlamuanpui tham a ni a, Ligue 1 club Angers forward Sofiane Boufal a lo awm lehzel bawk avangin Egypt tlarhnungin hna an ngah dawn.

Tlarhnung lam pawh en ila, Wolverhampton Wanderers defender Romain Saiss leh Paris Saint-Germain defender Achraf Hakimi te ho an awm a, vawi sarih ngawt champion tawh Egypt hneh turin an ṭha tawk.

A thlengtu hi
Zanin dar 9:30-a Gambia nena inkhel tur Cameroon pawhin beiseina sang tak an nei ang tih a chiang a, tun inelnaa goal ruk khunga top scorer ni mek Vincent Aboubakar an nei a, goal thum khungtu Karl Toko Ekambi a awm bawk.

Cameroon hian group stage-ah tlawm an nei lo a, last 16-ah Comoros chu 2-1 in an hneh bawk - mahni mualah, mipui puihna nena khel tur an nih avangin inrintawkna an nei sang ang tih a chiang a, Gambia tan beisei tur a tlem mai thei.

Chutihrual chuan Gambia hi last 16-a team ṭha Guinea hnehtu an ni a, group stage-ah Mali leh Tunisia an awmpui chungin tlawm an nei lo a, Cameroon tan zuam sual theih an ni.

Belgian club Seraing forward Ablie Jallow hian tun inelnaah goal hnih a khung tawh a, European football hmelhriat player dang an neih nual bawk avangin an tawh a khirh ang.

Inkhel dang
Tunisia-in last 16 aṭanga Nigeria an hneh avangin inrintawkna sang tak an nei ang tih a chiang a, he team hian Ligue 1 club Saint-Etienne forward Wahbi Khazri an nei tih hriat telsak a ṭha - ram tan match 68 khelh tawha goal 24 khung thei a ni.

Burkina Faso-in group A-ah Cameroon an ngam lo tih loh chu tlawm an nei lo a, last 16-ah Gabon chu 1-1 in inhnehtawkpui mah se penalty hmangin an pet chhuak bawk. Tlarhmaah Aston Villa forward Bertrand Traore chu innghahna a ni leh dawn a, tlarhnung lamah Bayer Leverkusen defender Edmond Tapsoba an nei bawk.

Senegal-in Sadio Mane an neih avangin an thla a muang a, he team hi group stage-ah an tlawm lo a, last 16-ah pawh harsatna lutuk awm loin Cape Verde chu 2-0 in an hneh thei - champion aia hniam an mitthla lo ang.

Tlarhnungah si ban nghak turin Chelsea keeper chhuanvawr Edouard Mendy, Napoli centre back Kalidou Koulibaly leh tlarhmaah Mane te ho an nei a, he team hian champion awm berah an inngai a nih pawhin an demawm hran lo.

Quarterfinal Fixtures
January 29, Inrinni Zan
Gambia 09:30 PM Cameroon
Burkina Faso 12:30 AM Tunisia

January 30, Pathianni Zan
Egypt 08:30 PM Morocco
Senegal 12:30 AM Equatorial Guinea