Aston Villa defender thar Chambers

Steven Gerrard enkawl Aston Villa chuan an squad an thuam chak zel. Villa hian Arsenal defender Calum Chambers an lalut a, kum thum leh a chanve daih inremna an ziahpui.

Kum 27 mi Chambers hian season kal laiah Gunners tan match nga chiah a la khel, nipuiah a contract neih lai hi a zo tawh dawn - Villa hi man nei loin a zawm, khawtlang media ṭhenkhat chuan pound maktaduai hnih an pe niin an ziak tel thung.

Tun thlasik bazar chhungin Villa hian Chambers bakah Philippe Coutinho chu Barcelona aṭangin loan hmangin an hawh a, pound maktaduai 25 senga Lucas Digne an lakluh bakah Robin Olsen chu AS Roma aṭangin loan bawkin an hawh.

English defender Chambers chuan, "Pawn lam aṭanga en pawhin Villa chhungah hian thil beisei awm tak a thleng tih a hriat theih a, a taka ka chang ve tur hi ka lawm, ka tan chuan duhthlanna dik a ni ang," tiin Villa a pan chungchang a sawi.

Villa hian season chawmhma lamah khan Manchester United aṭangin Axel Tuanzebe chu loan hmangin an hawh, mahse tun thla tir khan Tuanzebe hian Italian club Napoli a zawm - a hmun ruakah Chambers a ding dawng thung.

Villa manager Steven Gerrard-a'n player dang pawh a la melh zel, tunah hian Uruguay international midfielder Rodrigo Bentancur chu Juventus hnen aṭanga lak chhuah tumin hma an la mek nia sawi a ni.