World Cup khel turin Iran an tling
Asia aṭanga FIFA World Cup khel tur zawnnaah Iran chuan Ningani khan Iraq 1-0 in an hneh a, Qatar zin turin an tling. Group B inkhel dangah South Korea-in Lebanon 1-0 in an hneh a, Iran hnung zui turin an dinhmun a ṭha.
Group A lamah World Cup khel tura beiseina nei sang pathum Saudi Arabia, Japan leh Australia te an chak vek a, match thum khelh tur la awm boruak a sang sawt dawn. Asia hian World Cup-ah quota 4.5 an nei a, Iran chiah an la tling.
Iran tan Teremi
Azadi Stadium, Tehran-ah mualneitu Iran-in hnehna an chang a nih chuan World Cup khel turin an tling dawn tih an hria a, amaherawhchu hun chanve hmalamah mikhual Iraq an ṭan khawng ve tlat avangin goal a lut lo.
Second half minute 48-naah player theihna nei sang Mehdi Taremi a rawn lang a, inkhela goal awmchhun a khung. Kum 29 mi Taremi hi FC Porto tan a khel mek a, tun season league match bikah Portuguese club tan match 19 khelh aṭangin goal 11 a khung tawh. Hemi hma season hnih hian goal 18 leh 16 a khung bawk avangin Taremi hi Qatar-ah pawh inghahna tlak a ni ang.
Iraq hian an khingpui mualneitu an tibuai meuh lo a, Iran-in goal khat chauh khung mah se chak turin harsatna an tawk lo. Chutihrualin team pahnih hi Covid-19 vangin an buai ve ve. Iran hian an player chhuanvawr Sardar Azmoun chhiar telin player panga an chhawr thei lo a, Iraq lamin player pariat an chhawr thei lo bawk.
Iran hian 2014 leh 2018 khan World Cup khel turin an tling tawh a, tun hi kum zawna vawi thum an khelhna tur chiah a ni. Kum 1978, 1998 leh 2006 te khan Iran hian an lo khel tawh bawk a, Qatar hi ṭum ruk World Cup-a an inlanna tur a ni.
South Korea an him?
South Korea-in Saida International Stadium, Sidon-ah Lebanon an tlawh a, first half injury time-ah kum 24 mi Cho Gue-sung-a'n goal awmchhun a khung. Taegeuk Warriors hian an thiampuipa Son Heung-min chhawr thei lo mah se World Cup khel turin an tling hnai.
South Korea hian match sarih aṭangin point 17 an hmu a, anmahni hnaih bertu UAE aiin point riatin an hmu tam zawk. Group khat aṭangin team hnih an tling dawn a, South Korea tan match thum khelh hmabak la awmah point hnih hmuh a tawk.
UAE pawhin playoff khelh beiseina nei turin Syria 2-0 in an hneh. Group pahnihna pathumna ve vein Asia aṭanga inter continental playoff khel tur an zawng dawn. Asia hian South America aṭanga pangana an hmachhawn dawn avangin playoff aṭanga tlin hi a harsa ang.
Boruak a hot
Group B lamah Saudi Arabia, Japan leh Australia ten hmunruak pahnih an inchuh mek. Saudi hian Firas Al-Buraikan goal hmanga Oman an hneh avangin a chhe berah playoff an khel chiang tawh. Amaherawhchu Green Falcons hi an dinhmun thlirin playoff an khelh a ṭul a nih chuan an chesual hle tihna a ni thei ang.
Amaherawhchu Saudi Arabia hian match thum khelh hmabakah an elpui Japan leh Australia bakah China te an la hmachhawn dawn a, chetsual theih a la ni. Japan-in an mual Saitama Stadium-ah harsatna nei loin China chu Yuya Osaka penalty leh Ynya Ito goal hmangin 2-0 in an hneh a, February 1, Thawhlehnia Saudi Arabia nena an inkhelh turah an insawrbing nghal ang.
Australia-in Saudi Arabia nena an inkar tih zim theihna hun ṭha an hlah lo a, Melbourne Rectangular Stadium-ah Jamie Mcclaren, Tom Rogic, Craig Goodwin leh Riley McGree te goal hmangin Vietnam 4-0 in an sawp. Socceroos hian March thlaa Japan leh Saudi Arabia an hmachhawn hmain February 1, Thawhlehniah Oman an hmachhawn dawn a, chetsual a thiang lo.
World Cup Qualifier - asia
January 27, Ningani
Australia 4 - 0 Vietnam
AUS : Jamie Mcclaren 30'; Tom Rogic 45+2'; Craig Goodwin 72'; Riley McGree 76'
Japan 2 - 0 China PR
JPN : Yuya Osaka 13' (P); Ynya Ito 61'
Lebanon 0 - 1 South Korea
SOU : Cho Gue-sung 45+1'
Iran 1 - 0 Iraq
IRAN : Mehdi Taremi 48'
UAE 2 - 0 Syria
UAE : Caio Canedo Correa 43'; Yahya Al Ghassani 70'
Saudi Arabia 1 - 0 Oman
SAU : Firas Al-Buraikan 48'
February 1, Thawhlehni
Japan 03:40 PM Saudi Arabia
Lebanon 05:30 PM Iraq
Vietnam 05:30 PM China PR
Syria 07:30 PM South Korea
Iran 08:00 PM UAE
Oman 9:30 PM Australia
Group A
# Team Pld W D L GF GA GD Pts
1 Iran 7 6 1 0 12 2 10 19
2 South Korea 7 5 2 0 9 2 7 17
3 UAE 7 2 3 2 6 5 1 9
4 Lebanon 7 1 2 4 4 7 -3 5
5 Iraq 7 0 4 3 3 10 -7 4
6 Syria 7 0 2 5 5 13 -8 2
Group B
# Team Pld W D L GF GA GD Pts
1 Saudi Arabia 7 6 1 0 10 3 7 19
2 Japan 7 5 0 2 7 3 4 15
3 Australia 7 4 2 1 13 4 9 14
4 Oman 7 2 1 4 6 8 -2 7
5 China PR 7 1 2 4 7 13 -6 5
6 Vietnam 7 0 0 7 4 16 -12 0