Uruguay beiseina siamtu Luis Suarez
South America aṭangin ram lian pahnih Brazil leh Argentina te chu FIFA World Cup khel turin inpet tling tawh mah se a chanve aia tam hnawhkhah tur a la awm avangin boruak ala hot hle. Nimin zing khan Uruguay chuan World Cup khelh beiseina chhi nung turin Paraguay 1-0 in an hneh a, goal awmchhun hi Luis Suarez khung a ni.
Inkhel dangah Brazil leh Ecuador te 1-1 in an inhnehtawk a, Ecuador tling turin an dinhmuhn a ṭha zel. Argentina-in Lionel Messi tel loin Chile 2-1 in an hneh a, Angel di Maria leh Lautaro Martinez ten goal an khung.
Tukin zing khan Colombia leh Peru bakah Venezuela leh Bolivia te an inkhel a, result kan hre hman lo. South America-ah hian ram 10 an awm a, vawi hnih ṭheuh an inkhel chhuak dawn. World Cup khel turin a sang pali an tling ang a, pangana hian Asia ram aiawh nen playoff an khel leh ang.
A hunah Suarez
Uruguay-in Paraguay hmachhawn turin Estadio General Pablo Rojas-ah an lenglut a, team pahnihin World Cup khelh beiseina an la neih ve ve avangin inkhel boruak a sang. Uruguay-in tlarhmaah Luis Suarez leh Benfica forward Darwin Nunez te an inkawptir thei a, bench-ah Manchester United forward Edinson Cavani an la dah ṭha thei.
Amaherawhchu mualneitu Paraguay an ṭang khawng a, first half-ah goal a lut lo. Minute 50-naah Diego Godin ball vawrh chu Suarez hian vawi khatah pet nghalin goal pawimawh a khung. Paraguay-in siphurh an sut thei lo a, injury time-ah Gustavo Gomez chuan Jose Gimenez laka a foul avangin yellow card vawi hnihna a hmu a, an hnawt chhuak.
Uruguay hian February 2, Nilaini zing dar 4:30-ah Venezuela an hmachhawn leh dawn. Venezuela hi table mawngphahah an awm mek a, Uruguay tan point thum hmuh theihna remchang bakah a sang palia dinhmun insawhnghehna hun remchang a ni thei ang.
Goal leh red card
La Casa Blanca, Quito-ah Ecuador-in Brazil an mikhual a, table chung bera awm leh pathumnaa awm inkhel hi ṭan phat aṭangin inkhel a nung hle. Ṭan phat aṭangin mualneitu Ecuador goal bawh a na a, minute hnihna lekah Enner Valencia-a'n hnai tak aṭangin goal zawnah a tauh thei lo.
Brazil erawhin an chance ṭha a hlah lo a, minute rukna lekah Casemiro-a'n hnai tak aṭangin a su lut. Minute 22-naah Venezuela keeper Alexander Domínguez-a'n Matheus Cunha ball um lut chu a hmaiah a tlawh a, VAR hmanga ennawn hnuah red card pek a ni.
Aston Villa a hmingchher mek Phillipe Countinho-a'n box pawn chiah aṭangin freekick hi petin goal zawnah a pet lo. Colombian referee Wilmar Roldan-a card phawrh kawngah a insum lo a, minute 20-naah Emerson Royal chu yellow card vawi hnihna pein a hnawt chhuak a, player 10 ve vein an khelh a ṭul phah.
Player 10 ve vea inkhelh hnuah pawh inkhel a nung a, minute 75-naah Felix Torres-a'n corner aṭanga ball kal chu tauh lutin siphurh a sut. VAR hmangin Brazil an him hram a, Ecuador-in penalty ṭum hnih hmuh tawhah inngai mah se VAR hmangin sut a ni a, keeper Alisson pawhin VAR zarah red card a hmu lo.
Brazil boss Tite chuan, "Referee ruahmanna a fel lo. Palinaa awm mek ram Colombia aṭangin referee ruat a ni a, pakhatna leh pathumna an inkhelh avangin ruahmanna an siam fuh lo. Roldan hi referee ṭha tak ni mah se a thutlukna apiang khan sawi zui a hlawh zel. Inkhel harsa tak a ni a, Ecuador-in vawi 20 foul neiin keini lamin foul 12 kan nei ve bawk," tiin inkhel chungchang a sawi.
Argentina an tlo
Argentina-in Lionel Messi tel lo mah se khualmualah Chile 2-1 in an hneh tho. Albiceleste hian tun ṭum qualifier-ah hian hneh loh an la tawng lo.
Argentina hi Copa America-ah an champion a, kum hnih aia rei hneh loh an tawng tawh lo. An chak loh hnuhnun ber chu July 2019 daih tawh kha a ni a, Copa America semifinal-ah Brazil an hneh lo.
Lionel Scaloni hote hian February 2, Nilaini zingah Colombia an hmachhawn leh dawn a, Radamel Falcao telna team tan chak ngei a ṭul avangin Argentina tan record vawn nun a awlsam dawn lo.
South America
January 28, Zirtawpni
Ecuador 1 - 1 Brazil
ECU : Felix Torres 75'
BRA : Casemiro 6'
Paraguay 0 - 1 Uruguay
URU : Luis Suarez 50'
Chile 1 - 2 Argentina
CHI : Ben Brereton Diaz 20'
ARG : Angel di Maria 9'; Lautaro Martinez 34'
January 29, Inrinni zing
Colombia 02:30 AM Peru
Venezuela 03:30 AM Bolivia
February 2, Nilaini zing
Bolivia 01:30 AM Chile
Uruguay 04:30 AM Venezuela
Argentina 05:00 AM Colombia
Brazil 06:00 AM Paraguay
Peru 07:30 AM Ecuador