Newcastle United tan player lei a harsa

Transfer boruak tingaihnawmtu zingah Premier League relegation zone a awm Newcastle United an tel. Magpies chanchinin sawi a hlawh chhan chu nikum October thlaa Saudi Public Investment Fund-in neitu pumhlun nihna a lei vang a ni.

Saudi Public Investment Fund hian pound maktaduai 305-in Newcastle United hi an lei a, an hausakna hi pound tluklehdingawn 320 vela chhut a nih avangin transfer boruaka che na tura ngaih sa an ni. Premier League neitu zingah an hausak lawrlak a, amahni hnaih bertu Manchester City neitu Sheikh Mansour hausakna hi pound tlukledingawn 22.9 velin an chhut. Newcastle neitu hi a let 14 dawin a hausa zawk tihna a ni!

Player an lalut
Newcastle hian January transfer-ah player pahnih an lalut tawh a, Atletico Madrid aṭangin Kieran Trippier bakah Burnley aṭangin Chris Wood an lalut.

Kum 31 mi Trippier man hi pound maktaduai 12 a ni a, a chet ṭhat dan a zirin a la pung thei. Kum 30 mi Wood hi pound maktaduai 25 a ni ve bawk. Magpies player lak hi club ṭantute tana han phul hluaina tur an la ni lo a, Wood ngat phei chu mak tih a hlawh.

Chutihrualin Wood hi an elpui Burnley aṭanga an lakluh a ni a, Clarets tan channa nasa tak a ni. Burnley hi table mawngphahah an awm a, Woods awm loh hnuah an buaina belhchhahin a awm. Heti zawnga thlir chuan Magpies tan an elpui player chhuhsak hi a ṭhatna lai a tam.

Magpies-ah Bruno
Newcastle-in Lyon aṭangin Bruno Guimaraes an la thei dawn a, Brazilian midfielder hi World Cup qualifier khel tura a zin avangin Belo Horizonte-ah medical a nei ang.

Magpies hian Bruno Guimaraes hi an la fel thei mai dawna a lan hnuah Lyon lamin inremna an la neih loh thu an puang. Amaherawhchu nimin lam khan indawrna hi chhunzawm niin euro maktaduai 40 bawr velin an inrem theiah ngaih a ni a, chet ṭhat dan a zirin euro maktaduai riatah a la pung thei bawk.

Nimin lamah agent hlawh tur an tifel thei a nih chuan Newcastle-in medical nei turin Belo Horizonte-ah an staff an tir ang. Kum 24 mi Bruno Guimaraes hian tun season-ah Lyon tan match 20 a khel tawh a, goal a la khung lo.

Feet ruka sang Bruno Guimaraes hi defensive midfielder a ni a, a man zat hi a phu chiah em tih chu hunin a la hril ang. Season liam ta khan Lyon tan match 33 a khel thei a, goal thum khungin Ligue 1-ah Lyon hi palina a nihpui bawk.

Carlos an phal lo
Newcastle buaina tak erawh an club sum neih dan an hria a, an club dawrten player phu tawk aia tam an chhiar zel. Magpies hian Sevilla defender Diego Carlos lak an tum a, an beisei ang ngawtin 2020 Europa League-a Sevilla champion puitu leh Tokyo 2020-a Brazil gold medal lakpuitu hi lak a awlsam dawn lo.

Magpies-in Carlos an dawrna hi pound maktaduai 30 a ni a, amaherawhchu Spanish club-in an phal lo. Sevilla director of football Monchi chuan, "Tun dinhmunah chuan a remchang lo. January transfer hun chhung a rei lo a, a thlakna tur player lak a harsa. Hetiang chiah hian nipuiah an rawn kir a nih chuan ngaihdan kan sawh sawn thei ang," tiin thlasik bazara chhuah an tum loh thu a sawi.

Sevilla hian La Liga-ah pahnihna an awm mek a, defender pawimawh Carlos chhuah hi a rem lo. Monchi chuan sawi chhunzawmin, "An rawn dawrna zat hi a awm viau mah se a hun a fuh lo. Carlos nen hian kan inbia a, kan club-ah a hlim. Keini pawhin cham turin kan duh," tiin a sawi. Newcastle tan Carlos lakchhuak tur chuan manto uchuaka an dawr a ṭul dawn.

Hlawk tum Man United
Manchester United-in Jesse Lingard an chelh a, khelhna hmun an pek si loh avangin English midfielder hian a khelh phakna tur club zawm a duh. Newcastle-in Lingard hi lak an duh a, amaherawhchu Man United-in pawisa an phut an tam.

Man United hian Lingard hawh tur hian loan fee atan pound maktaduai ruk vel an beisei a, player hlawh kar khatah £100,000 pektir vek an duh. Hetah hian a la tawp lo, Newcastle-in Premier League an khel tura an inham tang a nih chuan bonus pound maktaduai 12 an beisei bawk.

Season liam ta khan Lingard hian West Ham tan loan hmanga khelin match 16-ah goal kua a khungsak a, hetiang bawka a chet ṭhat chuan Magpies tan himpui theihna tur player a ni. Amaherawhchu Man United hian Newcastle neitu hausakna hi remchangah an laah a ngaih theih a, Magpies lamin uchuak taka sum thehchhuah an tum bik loh avangin Lingard hi an la ta lo a nih pawhin a mak lo ang.