Sule-a'n Bayern a chhuahsan dawn

Niklas Sule leh Bayern Munich ten inremna an nei thei lo a, Germany international defender hian tun season zawhah a contract a hmang zo dawn. Kum 26 mi Sule hian nipuiah Bayern a chhuahsan dawn tih a chiang a, Europe club ten an ngaihven ang.

Bayern CEO Oliver Kahn chuan, "Niklas nen hian hun rei tak indawrna neih a ni a, contract ṭha tak an zawrh chungin a pawm lo. Kan club sum dinhmun kan thlir tel a ṭul avangin dinna chin kan neih a ngaih avangin inremna kan nei thei ta lo," tiin Sule chungchang a sawi.

Kahn chuan sawi chhunzawmin, "Kan team dinhmun uluk tak kan thlir tel a, Sule position-ah hian Lucas Hernandez, Dayot Upamecano leh Tanguy Nianzou te an awm a, Benjamin Pavard pawh a chhawr theih. Chutihrualin Niklas hi kan la mamawh a, season tawp thlengin kan hmang ṭangkai ang," a ti.

Germany defender hi Chelsea FC, FC Barcelona leh Newcastle United te nen sawi zawm a ni. Hoffenheim aiawha Lammualah pawh rawn inkhel tawh Sule hian Bavarians-in a theihna an ngaihhlut sak tawk loah a ngai thung.

Sule hi dollar maktaduai 10 hlawh tura dawr a ni a, a khelhpui Joshua Kimmich (€20m), Leon Goretzka (€18m) leh Kingsley Coman (€17m) te a tluk phak loh avangin contract thar hi a pawm duh lo niin an sawi ve bawk.