Barcelona-ah Adama Traore; Dembele a chhuak dawn?

Barcelona chuan loan hmangin an club academy chhuak Adama Traore chu Wolverhampton Wanderers aṭangin an lalut. Spanish club hian kum 26 mi Traore hlawh an tumsak ang a, a ngheta lakluh theih dan a awm bawk. Barca hian season tawpa contract zo tur Ousmane Dembele erawh chhuahtir tumin hma an la mek.

Xavi enkawl Catalan club hi La Liga-ah panganaah an awm mek a, an chunga awm Atletico Madrid point khatin an pha lo. Barca tan tun season-ah league nomawi chawi a har tawh dawn a, season thara Champions League khelh phak chu hmachhawp lian ber tur a ni tawh ang.

Wolves technical director Scott Sellars chuan, "Tute pawhin Barcelona khawpui leh club hi Adama-a'n a ngaina tih an hria a, anni tan chuan transfer duhthusam a ni," tiin player duh thlanna a nih thu a sawi.

Traore hi Barcelona aṭanga inzir chhuak a ni a, khelhna hmun a chan phak loh avangin kum 2015 khan pound maktaduai sarihin Aston Villa a zawm.

Premier League aṭanga Villa an relegate hnuah Middlesbrough a zawm a, Premier League club Boro zawmin an relegate. Championship-ah Traore hian hming a chher a, season khat chhungin Boro Fans' Player of the Year, Young Player of the Year leh Players' Player of the Year a dawng vek.

Wolves-in pound maktaduai 18-in Traore hi an lalut a, club record a ni. Premier League season thum leh a chanve chhungin match 123 khelin goal riat a khung. Spurs-in pound maktaduai 15-in Traore hi lakluh an duh a, Wolves-in an hnar. Chutihrualin London club hian Traore lakluh tumna an nei lo niin an sawi thung.

Spanish winger hian Wolves hian thla 18 contract a la nei a, English club hian contract pawhsei tum mah se inremna an nei thei lo. Kum 26 mi Traore hian Xavi rilru a hmin thei a nih chuan season tharah Premier League-a kir tawh loin La Liga-ah a khel chhunzawm thei ang.

Barcelona hian Ousmane Dembele chhuahtir dan an zawng mek. Catalan club hian pound maktaduai 96.8 zetin Borussia Dortmund aṭangin French winger hi an lalut a, a man hi pound maktaduai 135.5-ah a pung chho thei a ni.

Tunah erawh Dembele hi chhuahtir an duh avangin an match hnuhnung berah Alaves 1-0 an hneh ṭumin pawhin squad-ah an dah lo. Kum 24 mi Dembele hi season tawpah a contract a tawp dawn a, Barca tan January thlaa hralh hi a pawimawh.

Dembele hi Premier League club pahnih nen sawizawm a ni a, club hming tarlan ni lo mah se pakhat zawk hi Chelsea ni tura ngaih a ni. Zaninah transfer tawp dawn a, Dembele hmalam hun tur a chiang thuai dawn e.