Juventus striker thar Vlahovic

Tunlai striker chhuak thar ṭha ber zinga mi Dusan Vlahovic chuan Arsenal sawmna hnarin Juventus a zawm. Turin club hian Serbian striker hi pound maktaduai 58-in Fiorentina aṭangin an lalut a, man hi pound maktaduai riata pun theih dan a la awm bawk.

Fiorentina-in Vlahovic thlak nan Brazilian striker Arthur Cabral chu Swiss club FC Basel an lalut. Viola hi Serie-ah pasarihnaah an awm mek a, Juventus hi panganaah an awm thung.

Arsenal-in Vlahovic lakluh tum hian sum sen an inhuam a, Fiorentina phalna zat pawh pe ngam vek mah se Serbian striker an hmin zo lo. Gunners tan channa lai tak a ni a, Juventus tan hlawkna a ni thung.

Kum 2021 chhung khan Europe league sang pangaa goal khung tam ber chu Robert Lewandowski a ni a, goal 43 a khung. Polish striker hnaih ber chu Vlahovic hi niin goal 33 a khung a, striker lar dang Erling Haaland (30), Karim Benzema (30) leh Cristiano Ronaldo (25) te pawhin an tluk lo.

Vlahovic hian Ronaldo kalsan jersey number 7 a ha dawn a, tun season bikah Serbian striker hian match 21 aṭangin goal 17 a khung.

Fiorentina ṭantute erawh an thinur a, an hmelma Juventus-in an player pawimawh an chhuhsak hi an hrethiam lo. Kum 1990 khan Roberto Baggio chuan dollar maktaduai 10.8-in Fiorentina aṭangin Juve a lo zawm tawh a, tun hnaiah chuan kum 2020 khan Federico Chiesa an laksak bawk.