Burnley zawm tur Weghorst

Everton chuan manager hna ruak hnawhkhah nan Frank Lampard an dawr. Kum 43 mi Lampard hi nikum January thlaa Chelsea-in an ban hnuah club a la enkawl leh lo.

Portuguese mi Vitor Pereira leh club enkawl lailawktu Duncan Ferguson te pawhin Zirtawpni khan a vawi hnih nan interview hmachhawn leh mah se Toffees thuneituten Lampard rawih an duh.

Everton hian an player hlui Wayne Rooney pawh an dawr a, amaherawhchu Rooney hian a club enkawl lai Derby County talbuai laia chhuahsan a duh loh avangin a hnawl.

Toffees hian hian February 5-a Brentford nen FA Cup an khelh hunah chuan Lampard hi an lalut fel hman tura ngaih a ni.

Lampard hian player nih laiin Stamford Bridge-ah season 13 khelin match 648 a khelh aṭangin nomawi lian tham 11 a lakpui a, chung zingah chuan Premier League title pali leh Champions League (2012) nomawi a tel.

Kum 43 mi Lampard hian Derby County a enkawl hnuin Chelsea hi a kaihruai a, season hmasa berah palina nihpuiin FA Cup final a thlenpui. Amaherawhchu season hnihnaah match riatah vawi nga chak loin an ban.

Lampard hian Premier League-ah match tinah 1.67 points a hmu a, Premier League bikah Chelsea manager zinga point hmu tlem ber a ni. Chutihrualin Roman Abrahimovich hnuaiah Andre Villas-Boas (47.5%) chu inelna hrang hrang aṭanga teha Lampard aia record nei chhia a awm.