Rangers tan Amad-a'n goal a khung

Manchester United winger Amad Diallo chuan thla ruk chhung loan hmanga khel turin Rangers a zawm. Ivorian winger hi Inrinnia Rangers leh Ross County te 3-3 a inhnehtawk ṭumah inlan nghalin minute nganaah goal hmahruai a khung.

Amad hian kum 2021 khan Atalanta aṭangin pound maktaduai 19-in Man United hi a zawm. Ivorian winger hian Atalanta tana khelh hmasak berah goal a khung nghal a, Man United tana shot a neih hmasak berah goal khungin Premier League match hmasa berah assist a nei a, Ivory Coast tana home match a khelh hmasak berah goal a khung bawk.

Chutihrualin, kum 19 mi Amad hian Man United tan match kua chiah a la khel a, tun nipui khan loan hmang bawka chhuahtir tum ni mah se inhliam vangin a chhuak ta lo.

Rangers hian Amad hi a ngheta lak theih dan a nei lo a, chutihrualin tun season-a nomawi humhim an tumna kawngah erawh a ṭangkai thei ang.

Steven Gerrard chhuahsan Rangers hi Dutch manager Giovanni van Bronckhorst-a'n a enkawl a, Scottish Premiership-ah hmahruaitu ni mah se Celtic nen an inthlauhna chu point hnih chauh a ni.

Man United hi an inṭhuah thawl a, kum hnih dawn inhliam vanga khel thei lo Phil Jones pawh loan hmanga chhuahtir tum a ni. Jones a chungchanga English club leh Bordeaux te an indawr a, English defender hian Ligue 1 club hi a zawm a rinawm