AFCON 2021 ; Cameroon-in semifinal lut; mang rama cheng Burkina Faso

Africa Cup of Nations pawh a hmawr an bawk hnai leh ta a, he thuziak i chhiar meuh chuan semifinal khel tur team pawh i hre kim tawh hial ang.

Inrinni zan khan quarterfinal hmasa zawk khelh niin, inelna thlengtu Cameroon chuan Gambia beiseina chu 2-0 in an tihtawpsak a, semifinal lut hmasa ber an ni - Karl Toko Ekambi chuan goal hnih a khung.

Burkina Faso chu mang ramah an chen chhunzawm zel a, anni aia team ṭha zawka ngaih Tunisia chu 1-0 in an hneh. Dango Ouattara chuan goal awmchhun a khung a, hnawhchhuah a ni bawk!

Nizan khan quarterfinal match hnih dang khelh a ni a, zan dar 8:30-ah Egypt vs Morocco inkhelin zanlai dar 12:30-ah Senegal leh Equatorial Guinea an inkhel thung - he thu buatsaih a nih lai hian result kan hre hman lo.

Mangṭha, mang duhawm!
AFCON-ah a vawi khat nan Gambia an inlan a, anni ang ram tan chuan African football-a ram leh ram inelna sang ber khelh phak ringawt pawh hi thil ropui tak a ni tawh.

Mahse, African football-a team ṭha Mali, Tunisia leh Mauritania te nen group khata an awm chungin point sarih an hmu a, Mauritania leh Tunisia hi an hneh ve ve.

An beisei phak lohin last 16 an lut a, quarterfinal luh inchuhna inkhelah team ṭha zawka ngaih Guinea an hneh zui a, Liverpool midfielder Naby Keita hoa khel team hi pet chhuakin a thiam pariat zingah an tel!

Gambia-in an mang ram chhawm nun zel an duh a, mahse, quarterfinal-a an tawn erawh team ṭha satliah ni loin, inelna thlengtu Cameroon an ni a, Gambia tan an sang lua a ni.

Toko i tawk e...
Japoma Stadium, Douala-a inkhelah fans puihna nen Cameroon-in bul an ṭan ṭha nghal a, Collins Fai chuan chance duhawm nei nghal mah se a chhawr lo.

Tun inelnaa top scorer ni lai Vincent Aboubakar (6 goals) chuan a goal khung zat belhchhahna remchang nei mah se uiawm takin a tauh goal lo a, Gambia goalkeeper Baboucarr Gaye chuan ṭha zetin a ball tauh dang chu a dansak bawk.

Mahse, Gambia an ṭang rei thei lo - minute 50-naa Fai-a ball cross chu Gambia defender James Gomez aia zuang sang Toko Ekambi chuan tun inelnaa a goal lina turin a tauh lut a, a la duhtawk lo cheu.

Lyon forward hian goal a khung aṭanga minute sarih liam hnuah Martin Hongla siamsak chu an goal hnihna turin a khung leh a, Gambia tan thawhleh beiseina a bo zui a, Cameroon an tlang.

Burkina beiseina
Tunisia-in group stage hmang ṭha lutuk lo mah se last 16-ah team ṭha Nigeria an pet chhuak a, an player neih dan nena thlir pawhin Burkina Faso lakah chuan chak beisei ngam tur an ni.

Mahse, an forward chhuanvawr Wahbi Khazri-a'n chance duhawm vawi hnih a nei tih loh chu chhuan tur an nei meuh lo - Saint-Étienne forward hian freekick ṭha zetin a pet a, mahse, Burkinabe keeper Hervé Koffi chuan a lo dang hman.

Kum 30 mi forward hian yard ruk vel leka hla aṭangin shot sual bawk a, a goal lo chiang - mahse, Tunisia hian chak loh chhuanlam tur an nei tho a, an penalty ngei tura ngaih chu referee-in a pe lo.

Burkinabe defender Soumaila Ouattara chu Wahbi Khazri lakah hlauhawm takin a che a, Tunisia lamin penalty ngei turah ngai mah se referee-in an ngaihdan a ṭawmpui lo a, an vanduai.

Hero to zero
First half hun pek belh minute hnihnaah Dango Ouattara-a'n inkhela goal awmchhun a khung a, kum 19 mi lek forward-in goal a khung dan hi hmuhnawm a tling - hmabak a nei êng hle.

Ligue 1 club Lorient tana khel mek forward hian Blati Toure-a through ball um lutin defender pahnih a tlan pel a, ṭha zeta ball a lakluh hnuah goal-ah a chantir - mahse, minute 82-naah Tunisia left back Ali Maaloul a nghawk lui a, hnawhchhuah a ni.

Ouattara tan AFCON quarterfinal match pawimawhin zir tur a chhawpsak - theihna sang tak a nei a, mahse, a nungchangin a zir loh chuan African player dang tam tak angin a thamral ve thei.

AFCON quarterfinal-a vawi li an inlan tawhah Burkina Faso an la chak vek a, Tunisia erawh quarterfinal an inlan hnuhnung pasarihah vawi khat chiah an la chak thung.

AFCON - Quarterfinal
January 29, Inrinni Zan
Gambia 0 - 2 Cameroon
CAM: Karl Toko Ekambi 50', 57'

Burkina Faso 1 - 0 Tunisia
BUR: Dango Ouattara 45+2'