Kolkata derby-ah 'hero' thar a piang

Indian football ngainatuten Jamshid Nassiri hming an la hre ngei ang - East Bengal tana Majid Bishkar nena an inkawp chu hmuhnawm a tling ṭhin a, Indian football-a player man to ber pawl pawh a lo ni tawh ṭhin.

Iranian tlangval, tun hnua India khua leh tui nihna nei ta Jamshid Nassiri-a fapa Kiyan Nassiri chuan Inrinni zan khan Kolkata derby-ah hattrick a siam a, mahse, a pa hmangaih East Bengal tan ni loin Mohun Bagan tan a ni thung.

Inrinni zan ISL inkhelah East Bengal tan Darren Sidoel chuan minute 56-naah goal hmahruai a khung a, coach thar Mario Rivera hnuaia khel East Bengal hian hnehna an chan ngei a rinawm hman.

Mahse, Bagan-in tum dan dang an nei - minute 61-naa luhtir Kiyan Nassiri chuan khelmualah minute thum chiah hun a la hmang hman tihin si phurh sutna goal a rawn khung a, zan danglam bik a tawng.

Bagan-in penalty hmu zui mah se David Williams chuan goal zawnah a pet thei lo. Mahse, a pawi lo e, lungngaih tur a awm lo - Kiyan Nassiri a awm alawm!

Kum 21 mi forward hian draw result hmu mai tura mipui an inrin laiin, hun pek belh minute thumna leh minute linaah goal a rawn khung leh a, ISL chanchina hattrick siam thei naupang ber record thar a rawn siam - Kolkata derby-ah ani aia hattrick siam thei naupang an la awm lo bawk.

Indian football mai ni lo, khawvel huap pawha ngaihhlut hlawh Kolkata derby-ah hian hattrick siam thei an tam lo - Amiya Deb (1934), Asit Ganguly (1937), Bhaichung Bhutia (1997) leh Edeh Chidi (2009) hnua Kolkata derby-a hattrick siam leh thei hmasa ber chu Nassiri a ni a, a pa Jamshid nen Kolkata derby-a pafa goal khung thei hmasa ber an ni bawk - a nep lo.

Mizo hming lansarh ṭhinna Kolkata derby-ah hian Mizo pakhat chiah a inlan a, East Bengal tan Lalrinliana Hnamte chu minute 67-naah luhtir a ni.

ATK Mohun Bagan-in hnehna an chan avangin semifinal khel tura beiseina a nung thar leh ta a, East Bengal erawh table mawngphah an chhuahsan hleithei lo.

Zirtawpni zan khan ISL inkhelah Jamshedpur FC chuan 1-0 in FC Goa an hneh bawk a, inkhela goal awmchhun hi minute 49-naa Daniel Chima Chukwu khung a ni.

Jamshedpur tan ṭum dang ang bawkin Laldinliana Renthlei leh Ricky Lallawmawma ten inkhel bul an ṭan a, Mizo defender pahnih hi an dan pangngai angin an khel chhe lo.

Men of Steel (Jamshedpur sawina) in hnehna an chan avangin table-ah pahnihna an ni a, semifinal khelh ngei beiseina a sang ta hle - nizana Kerala Blasters leh Bengaluru inkhel result a zirin he thuziak i chhiar meuh chuan an dinhmun a danglam leh tawh thei thung.