Colombia hnehtu Peru-in beiseina thar an nei

November 21 aṭangin Qatar-ah World Cup 2022 khelh a ni dawn a, football mai ni lo, infiamna khawvela inelna ropui bera tel duhin ram tam takin thi leh thau pawlhin an bei leh ta.

South America-in hmun ruak chiang sa an neih pali aṭangin inelna hmachhawn tur pahnih an chiang tawh a, Brazil leh Lionel Messi telna Argentina chu Qatar-ah an zin ngei dawn - hmun ruak dang pahnih an la inchuh mek.

Inrinni zing khan Peru chuan rin hlawh zawk Colombia chu 1-0 in an hneh a, inkhela goal awmchhun hi MLS club DC United winger Edison Flores-a khung a ni - World Cup khelh beiseina an chhi nung zel.

Team pahnih intawn hma hian point 17 ve ve an nei a, a chak zawk chu top four huangah an awm dawn tih an chiang ve ve - mahse, mualneitu Colombia an ṭang viau chungin goal hmaah an vannei hleithei lo.

Colombia hian 69% ball chang chungin vawi 30 shot an nei a, vawi hnih chiah target-ah a kal thung - World Cup qualifier-a an match hnuhnung parukah goal an khung miah lo bawk!

Peru lamin vawi li chiah shot nei mah se goal zawna an vawi khat pet awmchhun a goal a, Edison Flores-a'n goal a khung hian minute 85-na a nih tawh avangin Colombia tan thawhleh a harsa tawh.

Inrinni zing inkhel dangah Venezuela chuan 4-1 in Bolivia an hneh a, Everton striker Salomón Rondón chuan Venezuela tan hattrick a siam a, Granada striker Darwin Machís chuan goal khat a thawh ve bawk.

Bolivia tan an ram club Royal Pari striker Bruno Miranda chuan goal khat khung ve bawk mah se awmzia erawh a nei thui phak lo.

South American football-a thuneitu sang ber CONMEBOL hnuaiah ram 10 an awm a, ram pali chu World Cup khel tura tling thei an ni - ram 10 hi an inkhelh kual vek hnuah a sang pali hi World Cup khel turin an tling dawn.

Table-a panganain inter-confederation playoff hmangin beiseina an la nei thei a, table mawngphaha awm Venezuela hian playoff hmanga tlin bak beisei tur an nei thei tawh lo - playoff an khel phak a nih chuan Asia lam aiawh pakhat nen hmun ruak pakhat an inchuh ang.