Tualchhung nula kutah nomawi

Tennis ngaina leh uar tak ni mah se Australian nula ten an rama inelna lianah hlawhtlinna chan an harsat, record duhawm lo tak an neih erawh tunah chuan thaichhiatin a awm ta - tualchhung nula Ashleigh Barty kutah Australian Open nomawi hlan a ni.

World number 1 Barty hian Inrinni tlai khan Danielle Collins chu 6-3, 7-6 (7-2) a hnehin a champion a, kum 44 hnuah Australian nula ngeiin Asutralian Open nomawi a chawi ve leh ta. Rod Laver Arena chhunga inkhel entute thawm a ṭha hle.

A chungnung
Barty ṭhatzia inhrilh nawn a ngai lo, mahse Australian Open bikah tak chuan final a khelh vawi khatna chauh a ni. Tun inelna a hmang ṭha a, final thleng tur hian set a hloh miah lo, a khingpui a piang a sawp vek.

American nula Collins lakah pawh rin lawk ang ngeiin set hmasa chu awlsam angreng takin a la. Set hnihnaah erawh 5-1 in a hniam fal hman, a vawi khat nan chiang takin set a hloh ngei dawn niin a lang hman.

Mahse, kum 25 mi Barty hi a chiai phah lo, a tisual chhunzawm duh tawh lo bawk. Tie break a khelhpui a, a tawp lamah phei chuan Collins hi beisei nei tawh lo ang maiin a talbuai hle, point hnuhnung ber hmu tura Barty-i forehand ropui chu hriat reng a ni tawh ang.

Duhthusam
Mipui thlawpna a dawng ṭha a, a tih dik apiangin thawm a ṭha fal ṭhin. Thlawpna ṭha tak hnuaia a champion thei chu Barty tan duhthusam a ni. Australian star chuan, "Aussie nih chuan hetiang baka hun duhawm leh hlimawm hi a awm thei tawh chuang lo.

"Fans duhtak te u, ka hah min chhawk bakah ṭha lehzual zawka tennis khel turin min pui a ni. Ka duhthusam ṭhin chu a takin a thleng dik ta, Australian mi ka ni hi ka nihlawh hle," tiin a thlen china a lungawi thu a sawi.

Barty hian 2019 khan French Open nomawi a chawi, nikum khan Wimbledon title la lehin tunah Australian Open champion a ni leh ta. A hmabak chu US Open a ni dawn, a chesual viau a nih loh chuan kuminah major title dang a lak belh a rinawm.