Tennis roreltu Rafael Nadal
Rafael Nadal chu Grand Slam champion hnem ber a ni ta! Kan sawi nawn leh ang, Spanish tlangval Nadal chuan Grand Slam nomawi 21 a nei ta a, mipa tennis player zingah major title la hnem ber a ni.
Nimin tlai Australian Open 2022 final hmuhnawmah Nadal hian Daniil Medvedev chu, darkar nga leh minute 24 chhungin 2-6, 6-7 (5-7), 6-4, 6-4, 7-5 in a hneh. Nadal tan Grand Slam nomawi 21-na a ni a, Melbourne Park bikah chuan 2009 baka a champion lehna hmasa ber a ni thung.
Mipa tennis player zingah Nadal, Roger Federer leh Novak Djokovic ten nomawi lian an kawl zat chu 20 ṭheuh a ni ṭhin, mahse tunah chuan Nadal-a'n a kalsan ta a, inelna lian an khelh leh hmabak chu French Open a nih avangin kum 35 mi Nadal hi a hma hun a la êng hle.
Final hmuhnawm
A kum tam zawk Nadal-a'n a tir aṭangin rei tak inkhelh a hreh lo tih a lantir, a hmanhmawh loh bakah rei tak tak chhung ball in pek kual a ngam hle. Spanish star hian match tir lamah a service aṭanga game la tur pawhin a thawhrim a ngai ṭhin hle.
Nidang angin Nadal service a ṭha tawk lo, ṭum hnih ngawt ama service bikah point a hmu miah lo! 6'6" ft a sang Medvedev-a'n a service a hloh ve lo a, awlsam miah si lo kha awlsam hmel taka lantir chungin set a la. Tawnhriat nei ṭha zawk Nadal-a'n tihsual a ngah, world number 2
Medvedev-a'n rang taka point hmuh aiin dawhthei taka nghah a hreh lo.
Russian star hian a khingpui tihsual vangin point a chhiar hnem a, set hmasa bikah ringawt pawh vawi 36 a chhawr. Nadal-a'n thapui a thawh, set hmasa pahnih aiin a forehand a na sawt a, a service chu la ṭha tawk lo mah se Medvedev service chu a chhaih buai phak zel a, tihsual a neih tlem tak hret bawk avangin set thumna leh palina a la.
Darkar thum a liam a, Nadal a phurin tihsual a nei tlem tial tial. Medvedev-a'n ngai la awh reng thei mah se Nadal a insiamṭha tawh a, darkar nga chuang an inkhelh meuh chuan player ṭha leh tawnhriat nei hnem zawk a ding chang.
Boruak inang lo
Season hmasa chawhnu lamah khan Nadal hi a ke phah a hliam, hun rei tak chhung inelna pangngai a khel thei lo. Australian Open hma inbuatsaihna tournament pawh a khel lo hial, a nihna takah chuan beisei san ngam a harsa.
Nadal chuan, "Thla tam vak lo liam taah kha chuan, kei leh ka chhungte bakah team nen kan sawiho fo a, hetiang renga ka dam thei lo a nih chuan tennis mangṭha a ngai mai dawn niin kan ngai hman," tiin atan fi nal thlen leh ringawt pawh beisei phak baka sang a nih thu a sawi.
Medvedev erawhin vanglai a hmang chho mek, world number 1 leh seeded pakhatna Novak Djokovic a inlan loh avangin ranking sang ber a ni a, seeded pahnihna pek ni mah se ani aia sang an awm chuang lo, a ṭhat lai ber a ni thung.
A zawna Grand Slam champion ni turin inrintawkna a nei a, tun inelna bikah phei chuan player hmuhnawm bik a ni. Semifi nal bika set nga a khelh tih loh chu deciding set pawh khelh a ngai lo hial, kum 25 mi tan chuan final a cho awm hle.
Player pahnih hi Australian Open hma khan vawi li an inhmachhawn a, record nei ṭha zawk Nadal-a'n 3-1 in hma a hruai. An inkhelh tawh zingah chuan 2019 US Open kha telin, set nga an khelh hnuah Nadal a chak - an intawn hnuhnung berah erawh Medvedev a chak ve thung.
Dan theih loh
"Ka naupan deuh lai khan tennis ball hi bang ka vuak per ṭhin, ball lo let leh chu ka lo vaw let zel thin a ni. Kha tih hunlai khan ka hma a ding hi Rafa, Roger emaw Novak emaw ni angin ka suangtuah ṭhin," tiin fi nal khelh hmain Medvedev chuan a sawi.
Russian tangval hian nikum khan US Open final-ah Djokovic hnehin nomawi a chawi. Season hmasa khan Novak a khel ṭha a, Grand Slam pali kawl khawm vek thei tura ngaih ni mah se Medvedev hian major tournament hnuhnung berah a lo dang chat.
Medvedev-a'n nikuma Novak a dan angin Nadal dan a tum a, theihna pawh a nei sangin a dinhmun pawh a ṭha hman hle. Mahse, Grand Slam a ni a, set nga khelh a ngai tlat si, a hmaa ding Nadal chu dan theih a ni lo - uiawm takin a chak lo zawkah a ṭang.
A kum tam deuh tawh mah se Nadal tha a ṭhum lo, a dam a nih phawt chuan match hautak khel turin a la ṭha tawk takzet. Chak lo Medvedev pawhin theihna a nei sang a, hma hun a la ngah avangin nomawi lian tam zawk pawh a la chawi theih a rinawm.
Thil thlen dan...
Set Khatna
• Nadal-a'n service hmasain, point hmasa ber forehand hmangin a vaw chhuak.
• Game thumnaah Medvedev chuan break point vawi hnih hmu mah se set a la lo.
• Game hnih ve ve an lak hnuah Nadal-a'n a service a, point hmu miah loin game a hloh.
• Nadal-a'n point hmu lo bawkin service a hloh nawn; Medvedev-a'n service hloh ve loin set a la
Set Hnihna
• Nadal bawkin a service hmasa, an service hmasa chu an la ve ve.
• A vawi khat nan Medvedev-a'n service a hloh, Nadal-a'n la chhunzawmin 4-1 in a fal.
• Medvedev-a'n a chhuhsak let ve leh a, nihrual theihna nei mah se service a hloh.
• Nadal-a'n 5-3 a hmahruai chungin a service, break point vawi nganaah Medvedev-a'n a chhuhsak.
• Tie break an khelh hnuah Medvedev-a'n harsa takin set a la
Set Thumna
• Medvedev-a'n service hmasain vawi nga an deuce hnuah game a la.
• Service an hloh duh lo, mahni service ṭumah chuan harsa tak pawhin game an la zel.
• Game li ve ve an lak hnuah Nadal-a'n a break sak, set la turin a service a la a ngai.
• Point hloh miah loin Nadal-a'n a service a la, a tan set hmasa ber a ni bawk
Set Lina
• Mahni service ve ve an la, game thumnaah Nadal-a'n chhuhsakin 2-1 in hma a hruai.
• Medvedev-a'n chhuhsak let ve leh nghalin 2-2 a nih rual leh nghal.
• A service hloh ve mah se Nadal a che fuh zawk, a khingpui service vawi hnih chhuhsakin set a la.
• Nomawi chawi tur tih chian nan set ngana khelh a ngai.
Set ngana
• Mahni service an hloh duh lo, game hnih ve ve an lak hnuah Nadal-a'n chhuhsakin 3-2 in hma a hruai.
• Nadal-a'n a service hum zuiin 4-2 in hma a hruai fal, a dinhmun a ṭha ta hle.
• Nadal-a'n 5-4 a hma a hruai laiin a service a, la ni se a chak ang - mahse a hloh.
• Service hloh mah se a chhuhsak let lehnghal, a service hum zuiin Nadal a chak.
Rafael nadal Hlawhtlinna
Australian Open 2009, 2022
French Open 2005, 2006, 2007, 2008, 2010, 2011, 2012, 2013, 2014, 2017, 2018, 2019, 2020
Wimbledon 2008, 2010
US Open 2010, 2013, 2017, 2019
Grand slam chawi hnem
# Player Kum Ram Titles
1 Rafael Nadal 35 ESP 21
2 Roger Federer 40 SWI 20
3 Novak Djokovic 34 SER 20
4 Pete Sampras 50 USA 14
5 Roy Emerson 85 AUS 12
FINAL THLIRNA TAWI
Nadal stats Medvedev
3 Aces 23
5 Double faults 5
117/189 1st serve in 126/182
78/117 Win 1st serve 89/126
34/72 Win 2nd serve 23/56
7/22 Break points won 6/22
30/50 Net points won 28/50
69 Winners 76
68 Unforced errors 52
182 Total points won 189