Man City duh ber Champions League nomawi

Man City duh ber Champions League

Manchester City-in Manuel Pellegrini hnuaia nomawi pali Champions League, Premier League, FA Cup leh League Cup an beisei vek laiin kum 2016 khan Pep Guardiola an lakluh thu an puang. English club hian Pep-a hi Barcelona-a a sulhnu hrechungin an lalut tih a chiang a, an duh chu Champions League a ni.

Zanin dar 12:30 hian Premier League champion Man City chuan tun season Champions League zin kawng ṭan nan Lyon chu Etihad Stadium-ah an mikhual dawn. Group F inkhel dangah Shakhtar Donetsk leh Hoffenheim te chu zanin dar 10:25 hian an inkhel bawk ang.

Europe a dang
Manchester City khelh danah Pep Guardiola kut hnu a lang ṭan a, an game mawi hmangin Premier League an thunun thei a, English champion an ni. Amaherawhchu, Man City hi Europe-ah chuan anmahni aia sulhnu nei ṭha Liverpool lakah season liam ta khan a thamral a, an nomawi duhna erawh a zual tulh tulh thung.

Pep-a enkawl City-ah beiseina a san avangin group stage paltlang hi an thlir ber a ni tawh lo a, tunah chuan semifinal-ah pawh lawm a kim tawh lo a, an duh chu nomawi a ni. Chutihrualin Europe inelna sang ber erawh a danglam a, City hian Champions League nomawi chawi tawh pahnih Claudio Bravo leh Danilo te chiah an kawl avangin champion hi a awlsam dawn lo.

City chu...
Manchester City-in Community Shield-ah Chelsea hnehin season bul an ṭan a, Arsenal an hneh zui bakah Huddersfield 6-1 in an sawp thei. Chutihrualin Pep-a hote hi kai thar Wolves nen an inhnehtawk a, hemi hnua Newcastle (2-1) leh Fulham (3-0) an hneh danah Spanish manager a lawm tawk lo bawk.

Fulham nena an khelh dan sawiin Pep chuan, "Player pakhatin a tihsual a neih chuan a dang tam tak a nghawng. An theihna thlirin an awlsam taka tih dik tur an tisual a, hma an la sawi thei tih lantir ka duh," tiin 3-0 in chak mah se an khelh dan a la duh khawp lo.

Pep Guardiola chuan, "A pawimawh ber chu khelmuala chet ṭhat a ni a, Champions League bikah chuan kan la khelh ṭhat tawk loh miau avangin champion hi kan la phu lo. Engtin pawhin an sawi thei a, rinkai tiin min sawi thei bawk. Engpawh chu ni se kan chet ṭhat a ngai a, khelmualah ka player-te hian an hlutna hi an pholan a ṭul a ni," tiin an hlutna mila an khelh ṭhat a ṭul thu a sawi.

Lyon nen...
City leh Lyon te hi tun hmain an la intawng lo. French club hi Ligue 1 lamah an che ṭha tawk lo a, match ngaah point sarih chauh an la hmu. An match hnuhnung pahnihah Nice an hneh loh bakah Caen nen an inhnehtawk a, City khel tawk tur niin a lang lo.

Amaherawhchu, City tana khel French defender Aymeric Laporte chuan, "Lyon player ṭhenkhat hi French national team aṭangin ka hria a, an khel hi ka en fo bawk avangin team ṭha tak an ni tih ka hria. Champions League-ah chuan team zawng zawng an ṭha vek a, kan khelh tur apiangah 100% kan pek a ngai a ni," tiin a sawi.

Pep leh UCL
2 - Guardiola-a'n Barcelona a enkawl lai ṭum hnih (2009 leh 2011) Champions League-ah a champion.
5 - Ṭum nga semifinal a lut tawh a, Barcelona-ah vawi hnih leh Bayern Munich-ah ṭum thum.
104 - Qualifying round tel loin UCL bikah match 104-ah team a enkawl tawh a, Sir Alex Ferguson, Arsene Wenger, Carlo Ancelotti leh Jose Mourinho te chiah a tluk lo.
60.2 - Europe club-te tana inelna sang bera Guardiola chak percentage chu 60.2% a ni.

2011 hnuah final thleng lo
Pep Guardiola-a'n Barcelona a enkawl hnuah Champions League-ah a tawp a khar fuh thei lo a. Catalan club chu 2008-09 leh 2010-11 season-ah a champion pui a, hemi hnu hian final a la thleng leh lo a, Bayern Munich leh Manchester City-ah a hlawhtlinna hi a chhunzawm thei lo.

2011-12, Barcelona: Semifinal
Chelsea-in first leg-ah Didier Drogba goal hmangin 1-0 in Barcelona an hneh a, second leg-ah hun tawp dawna Fernando Torres goal hmangin Blues leh Catalan club 2-2 in an inhnehtawk. Guardiola chuan, "Ball possession kan ngah zawk a, amaherawhchu hei hian awmzia a nei lo a, chakna pawh a ni lo. Chance vawi 24 kan insiam a, kan chak chuang lo," tiin a sawi.

2012-13, team a enkawl lo Pep Guardiola chuan Barcelona a chhuahsan a, season khat chhung hahdamna hun atan a hmang bawk.

2013-14, Bayern Munich: Semifinal

Santiago Bernabeu-ah Pep-a enkawl Bayern chu 1-0 in an chak lo a, Allianz Arena-ah mualpho zuiin Real Madrid-in 4-0 in hnehna an chang a, aggregate-ah Spanish club hi 5-0 in an chak. Guardiola chuan, "Ball nen khan kan che hlei thei lo a, ka thiam loh a ni. Europe-a inelna sang berah chuan khelh ṭhat loh bakah set piece dan theih loh chu a thiang lo," tiin an khelh ṭhat loh thu a sawi.

2014-15, Bayern Munich: Semifinal
Pep-a'n Bayern a enkawl season hnihnaah a club hlui Barcelona chu aggregate-ah 5-3 in an hneh lo. Nou Camp-ah Lionel Messi telna Barca-in 3-0 in hnehna an chang a, second leg-ah Bayern-in 3-2 in hnehna chang mah se awmzia a awm tawh lo.

Guardiola chuan, "Luis Enrique-a'n Barcelona-ah hna ṭha tak a thawk a, final luh an phu. Nou Camp-a kan chet ṭhat tawk loh kan tuar a ni," tiin a sawi. 2015-16, Bayern Munich: Semifinal
Bayern a enkawl hnuhnun berah Pep-a'n Spanish club tho Atletico Madrid an hneh lo a, an chak loh dan erawh away goal rule a ni. Khualmualah Bayern goal khatin an chak lo a, Allianz Arena-ah 2-1 in chak mah se Antoine Griezmann away goal chu Atletico tan chak nan a tawk.
Guardiola chuan, "Bayern hi Champions League chawi pui ngei ka duh a, ka theihna zawng zawng ka chhuah. Madrid-ah khan second half-ah kan khel ṭha a, Allianz Arena-ah pawh kan khel ṭha. Chutiang bawkin inkhel dangah pawh kan che ṭha a, hahdam takin mu thei ang," tiin theihna zawng zawng a chhuah avanga lungawi thu a sawi.
2016-17, Manchester City: Round of 16
Pep Guardiola-a'n Manchester City a enkawl hnuah Champions League-a a chet chhiat ber ṭum a tawng. English club-in Etihad Stadium-a 5-3 a an chak hnuah Pep-a'n attacking player a luhtir a, Monaco-in 3-1 in an hneh let a, away goal rule hmangin French club an chak.
Guardiola chuan, "Champions League-ah chuan ṭha lehzuala khelh hi a ṭul a, a chang chuan khelh ṭhat leh vanneih a ṭul. Hmasawn ngei kan tum ang," tiin an vanduai thu a sawi.

2017-18, Manchester City: Quarterfinal
Season liam ta quarterfinal-ah Manchester City chu English club tho Liverpool nen an inhmachhawn a, Anfield-ah Premier League thununtu City 3-0 an chak lo a, Etihad Stadium-ah 2-1 a an chak loh nawn avangin Reds lakah 5-1 in an tlawm.

Guardiola chuan, "Ka mitah chuan goal a ni ngei a, halftime-a 1-0 a hmahruai leh 2-0 hmahruai chu a dang daih. Anfield-a an goal hmasa ber kha offsdie a ni a, hetiang inelna sangah chuan referee thutlukna tihsual hian nghawng lian tak a nei a ni," tiin referee thutlukna vanga chak loah a inngai.