Europe-ah Juve kawr hain Ronaldo

Juventus-in 1996 hnuah Champions League-ah an la champion leh lo a, Italian champion hian Europe inelna sang bera vawi nga champion tawh Cristiano Ronaldo an lalut. Zanin dar 12:30 hian Ronaldo hoin Juventus-in Mestalla Stadium-ah Valencia an hmachhawn dawn.

Group H-ah Ronaldo larchhuahna club Manchester United a awm bawk a, Jose Mourinho hote hi Young Boys nen Switzerland khawpui Bern-ah an inkhel ang.

Messi ngaihdan

Juventus-in inelna hnuhnung paliah ṭum hnih final an lut thei a, an chak lo ve ve. Hei vang hian mimala Champions League nomawi kawl hnem bertu Ronaldo an lalut thei hian inrintawkna nasa tak a pe ang.

Tun thla tir khan Lionel Messi chuan, "Ronaldo hi Madrid chhuahsan turin ka suangtuah ngai lo a, Juve a zawm ang tih ka ngaihtuah pha lo. Mak ka ti takzet," tiin Catalunya Radio a hrilh.

Messi chuan, "Real Madrid hi team ṭha ber zinga mi an ni a, squad pawh an nei ṭha. Ronaldo chhuak mah se an chhiat phah lo. Chutihrualin Juventus hi team ṭha sa an ni a, Ronaldo an neih avang hian an ṭhat phah leh zual ang," tiin a elpui a fak.

Engtin zel?

Cristiano Ronaldo-a'n Serie A-ah match thum chhung goal a khung loh hnuah Pathianni khan Sassuolo nen goal hnih a khung a, zanin hi Juventus kawr haa Europe-a a inlanna hmasa ber tur ni mah se Champions League-a goal khung ber ni lai a nih avangin a tlangnel sa ang.

Juventus forward Paulo Dybala chu hliam vangin Valencia hmachhawn turin a dinhmun a chiang lo a, Spanish club lamin midfielder Geoffrey Kondogbia an chhawr thei dawn lo thung.

Old Lady hi Serie A-ah a zawnin vawi sarih an champion tawh bakah tun season league-ah an la chak vek a, Valencia erawh match li khelh tawh aṭangin point thum chiah an la hlawh chhuak a, chak an la nei lo.

Rio thlirna

Manchester United defender hlui Rio Ferdinand chuan a club hlui chu knockout stage lut turin ring mah se an thlen thui a beisei a pui lo.

A hun laia defender manto ber ni thei Ferdinand chuan, "Tlarhnungah innghahna an nei lo. Goalkeeper-ah erawh Superman an kawl a, chuti chu ni lo se season thum liam ta pawh khan a talbuai khawp ang. Lindelof a hlawhchham a, Bailly pawh a fuh lo. Smalling leh Jones pawhin bul an ṭantirha an chunga beiseina kha an tihlawhtling thei lo. Juventus nen group khatah awm chungin group stage paltlang ring mah ila an thlen thui ka ring lo," tiin a ngaihdan a sawi.

United hian Brighton leh Tottenham an hneh loh zawn hnuah Burnley leh Watford te an hneh leh tawh a, league lama hrem Marcus Rashford leh Nemanja Matic te an chhawr theih avangin Young Boys hmachhawn tur pawhin an inpeih.