Maradona naute an chak nghal

Argentina legend Diego Maradona-a'n Me­xi­can second division club Dorados a enkawl hnua a match hmasa ber chu Thawhṭanni khan a hma­chhawn a, an khingpui Cafetaleros chu 4-1 in an hneh.

Player a nih laia khelmual chhunga ropui tak Maradona hi coach a nih hnuah a ropui lem lo a, Mexico-a a bul ṭan dan erawh duhthusam a ni. Maradona chuan, "Mi tam tak chuan hman tlak loh leh engmah lo mai angin min sawi ṭhin, tun ṭumah erawh match ṭha tak kan khel a ni," a ti.

Kum 57 mi Maradona chuan sawi zawmin, "Kan chak hi ropui taka sawi tur a la ni lo, a bul ṭanna chauh a la ni. Eng thil ṭha mah kan la tawng lo a, a sang thei ang ber thlen kan tum ang," a ti.

1986 World Cup-a Argentina champion puitu Maradona an neih hnuah Dorados-in inkhel entu a ngah nghal, tun hma chuan an khelmuala fans pungkhawm chawh­rual chu 4,000 vel a ni a, manager thar an neih hnua an match hmasa berah erawh fans 10,133 zet an kal khawm a ni.