Saina a tla - Sindhu a tlang

Nimin khan Indian shuttler pahnih ten bad­minton inelna ngaihhlut pakhat China Open World Tour Super 1000 tournament an khel a, tawnhriat ngah zawk Saina Nehwal a tlak laiin, tun hnaia khel ṭha tak PV Sindhu erawhin last 16 a inhlangkai thung.

Olympic Sports Center Xincheng Gymnasium, Changzhou-a inkhelah Rio Olympic silver medalist Sindhu chuan world number 39 Saena Kawakami chu 21-15, 21-13 in a hneh.

Sindhu-i'n inkhel tir aṭanga a tawp thlengin buaina a tawk lo a, game hmasa zawkah 13-7 ngawta hma hruaiin a tlang a, game hnuhnung zawkah pawh a san fal lai chuan 20-12 ngawt tein hma a hruai thei.

Hmeichhe singles inkhel dangah world num­ber 1 hlui Saina chuan game hmasa ber la mah se, minute 48 an inkhelh hnu­ah South Korea nula Sung Ji-Hyun chu 22-20, 8-21, 14-21 in a ngam lo a ni.