Pro Fight-ah Meghalaya, Manipur, Assam aṭangin boxer
Zothan Autoworks LPS Pro Fight chu October 10 aṭangin R. Dengṭhuama Indoor Stadium, Mualpuiah khelh ṭan a ni leh dawn a, ngawrh takin inbuatsaihna kalpui mek a ni. Tualchhung boxing inelna ngaihhlutah hian Manipur leh Meghalaya atangin boxer pakua an tel theih a beiseiawm a, Assam pawhin boxer an tir chhuak dawn tih oragnising committee an hriattir.
Weight panga zinga paliah Meghalaya chuan boxer pakhat ṭheuh an tir chhuak thei dawn tih an sawi a, middleweight-ah erawh boxer an nei dawn lo. Manipur-in weight hrang pangaah boxer tirh chhuah vek theih an inrin thu an sawi tawh a, chutihrualin tute nge Pro Fight khel tura feh chhuak tur hming erawh an la tifel lo a ni.
Inelna a hlawhtlin leh zual theih nan state dang dawr an ni a, Boxing Federation of India joint secretary Dr Lalrozama chuan, "Assam pawhin boxer tirh chhuah an tum a, eng zat nge tih erawh a chiang rih lo, weight hrang pangaah tel vek an tum a ni," a ti.
Indian boxing aiawha Northeast bialtu Dr Rozama chuan hmarchhak state dang pawh a remchan anga dawr zui a nih tur thu a sawi a, thenawm state-ten Pro Fight khelh an chak hle niin a hriat a, Indian boxing hruaitute hnenah pawh organising committee leh state dang indawrna hriattir a ni tawh tih a sawi bawk.
Pro Fight hi 2009 aṭangin kalpui a ni a, tun hi a vawi riatna tur niin; a vawi khat nan state dang aṭanga boxer ṭhate an tel dawn. Sawm bik state dang aṭanga tel turte hi national championship khel tawh emaw state level-a medal la tawh chin emaw an ni tur a ni.
Kawng hrang hrangin inbuatsaihna kalpui mek a ni a, September 17, Thawhtanni tlai thlengin Mizo boxer 180 velin Pro Fight-a tel tumin form an la chhuak tawh a, tun thla chhung hun hawn a ni.