Beidawng duh lo Brighton tan point khat

Hun tawp hma chiaha Glenn Murray-a penalty chhuih luh hmangin Brighton & Hove Albion chuan Southampton laka an si phurh an sut zo a, a zawna an match hnih nan goal hnih an phurh hnuah point khat an hlawh chhuak leh ta.

Thawhṭanni zan Premier League inkhelah Southampton leh an mikhual Brighton chu 2-2 in an inhnehtawk a, club pahnih hian match nga khelh aṭangin point nga ve ve an hmu tawh.

Goal li chu

Saints tan Pierre-Emile Hojbjerg chuan yard 35- a hla aṭangin goal hmahruai a khung a, chawlhlawk laiin si khat faiin hma an hruai. Second half-ah pawh a che fuh hmasa zawk an ni, Danny Ings-a'n penalty khungin 2-0 in an chungnung a, harsa lutuk loin an chak dawn niin a lang.

Mahse, Ings-a goal a luh aṭanga minute hnih hnu lekah Shane Duffy chuan Anthony Knockaert ke a ṭanga ball chhuak chu tauh lutin an si­phurh a sut ṭhen. Duffy bawk hian hun tawp dawnah penalty hlawh chhuakin an si phurh sut zawh nan an hmang.

Thawhṭani zan bikah Saints lamin result ṭha an nei hleithei lo chhunzawm, league match an khelh hnuhnung 11-ah chak ni hmel an hmu lo a, heng zinga ṭum sarih zet chu an tlawm a ni. Brighton lakah point thum hmu ngei tura an ngaih sa pawh an hum thei lo.

Brighton an tlo

Chris Hughton-a enkawl Brighton hian September 1 zan khan Fulham lakah goal hnih an phur hmasa tawh a, chumi hnuah point khat an sual chhuak thei. Fulham an hmachhawn ṭuma goal hnih khungtu Murray bawk a pawimawh leh a, ani hian Southampton laka inkhel bul a ṭan vawi rukah goal nga a khung thei.

Hliam vangin Pascal Gross chhawr thei lo mah se tlanghma lam an ṭangrual a, midfielder Solly March forced chuan Saints goalkeeper Alex McCarthy tan hna hautak a siamsak fo. Chak lo tura ngaih an nih hnua point khat hmuh theih hi an tan a hlu.

Tun season chhungin Man­chester United laka 3-2 a an chak bak hnehna la chang lo mah se manager Hughton a lawm thiam. Hughton chuan, "Midang khelmuala kan leng a nih chuan kan dinhmun a ṭha lo nghal, a bik takin Southampton te ang lakah si hnih kan phur a nih chuan a harsa lehzual. Point khat kan hmu hi lawmna tur a ni a, ka naute khan an theihna zawng zawng hmanga an beih let avangin chawimawi an phu," tiin a sawi.

Saints an fuh lo

Mark Hughes kaihhruaina hnuai­ah Sou­thampton-in season bul an ṭan fuh tawk lo a, international break neih hma chiah khan Crystal Palce an hneh, Palace laka an chak hi hnehna an channa hmasa ber niin, chawlh a awm zui hi an tan a fuh lo niin a lang.

Inkhel thunun tak chung siin goal hmaah Saints player an hriam tawk lo, an beisei ang point hmu lo mah se Hojbjerg leh Mario Lemina ten midfield an thunun a hmuhnawm, nipui bazar laia an lakluh Jannick Vestergaard chu a hnung lamah a rintlak viau bawk - an khelh ṭhat ni chuan club vantlang dang chu hneh thei tur an ni.

Southampton boss Mark Hughes chuan, "A zawna hneh­na chan kan tum a, kan dinhmun pawh a ṭha hman hle. Mahse, kan duh leh beisei ang khan thil a thleng ta lo, penalty kan hmuh danah lungawi a har a, kan khingpui lam khan referee kha an bawr buaiin thutlukna dik tawk lo a siam theih nan an pui a ni," tiin a sawi.