Vawiinah Mizoram cricket team inlan hun

Cricket Association of Mizoram tirh Mizoram team chuan Vijay Hazare Trophy-ah tukin zing dar 9:00 hian Arunachal Pradesh an hmachhawn dawn.

Mizoramin first class cricket an khelh hmasak ber a nih a nih avangin vawiin hi hun chhinchhiahtlak a ni a, captain K. Vanlalruata chuan, "Kan vawi khat khelhna tur a nih avangin pressure kan nei lo a, beisei a sang lo. Chutichung chuan Mizoram tan theihtawp kan chhuah dawn a, kan inringtawk hle," tiin Vanglaini a hrilh.

Plate Group-ah Mizoram hi Arunachal Pradesh, Bihar, Manipur, Meghalaya, Nagaland, Puducherry, Sikkim leh Uttarakhand te nen an awm a, table mawngphaha awm loh chu an tum ber a ni.

Mizoram team coach P. V. Shashikanth chuan Karnataka pawh a enkawl tawh a, India cricketer ṭha KL Rahul leh Karun Nair te pawh a enkawl tawh.

Shashikanth chuan, "Professional ka ni a, eng team pawh enkawl thei tur ka ni. Mizoram tan chuan engkim hi thil thar vek a ni a, chuvangin match tinah hmasawnna hmuh zel kan tum ang. Captain tawnhriat nei ṭha tak, Under 16 velah pawh ka enkawl tawh Ruata, ka hriat chian sa Sinan Khader te, Taruwar Kohli leh Akhil Rajput te kan kawl bawk avangin beisei kan nei sang ve hle," tiin a sawi.

Mizoram Cricket Team - Vijay Hazare Trophy
K .Vanlaruata, Captain Durtlang
Michael Lalremkima, Vice Captain Kulikawn
Lalhmangaiha Dawrpui
C. Lalrinsanga Zotlang
Gaurav Singh Khatla
Saidingliana Sailo Siaha
Lalhruaimawia Ralte Bawngkawn
G.Lalbiakvela Luangmual
Lalnuntluanga Ramhlun North
Zorinliana Zarkawt
R.Lalnunkima Khatla
Lalrempuia Champhai
Taruwar Kohli Punjab
Akhil Rajput Mumbai
Sinan Khader Karnataka
Head coach PV Shahikhant Karnataka
Trainer Subhash Pawar Gujarata
Physio Karan Nayar Jammu & Kashmir
Manager Lalroṭhuama Durtlang/CAM vice president