Zaninah TT league kharna

Donic Table Tennis League 2018 chu zanin hian Mizoram Table Tennis Hall, Mission Vengah a hmawr bawkna neih a ni dawn a, zan dar 6:00-ah pathumna zawn hmasak tur niin; a zawh hnuah final khelh zui a ni ang. Inkhel hi Zonet Rihnim leh Zonet HD laman live a pekchhuah tur a ni.

Nomawi inchuh tur hi Aizawl Hmar lam aṭanga inlan awmchhun Ramhlun Knights leh club din thar Aizawl Hospital & Research Centre Titans te an ni.

AH & RC Titans tan phuba lak theihna hun ṭha a ni a, chutihrualin Ramhlun Knights tan erawh league round lama an hneh tawh sa an nih avangin a harsa lo tura ngaih a ni.

Titans lam hian tawnhriat ngah - national junior champion David Zodinpuia, Lalmalsawma leh Lalmuanawmi te an nei a, an khelh ṭhat ṭum a nih chuan champion pui tham an ni. Final lut tura an kalkawngah pawh champion tura rinkai ni phak Techmaze chu 8-5 in an hneh thei. Ramhlun lamin India tana fehchhuak fo tawh Lalhunhlua an nei a, team ṭha I San Khay 9-6 a hnehin final an lut.

Aizawl District TableTennis Association buatsaih inelnaah hian team tan lawmman siam a ni a, champion team tan Rs 80,000 niin pahnihna chuan Rs 50,000 an dawng ang, heng bakah hian mimal lawmman siamsak an ni dawn bawk.