Champion Real khelmualah Roma

Champions League-a a zawna vawi thum champion thei Real Madrid-in zaninah an Europe zinkawng an zawh ṭan leh dawn ta a, tun ṭumah erawh zinkawng ṭanpuitu a dang ta.

Zinedine Zidane hoin Real hian season thum chhung Europe-ah ro an rel thei a, French manager hi tunah erawh Spanish club-ah a awm tawh lo. Zidane hmunruak luah turin Julen Lopetegui lakluh a ni a, a hna chhunzawm tur a hautak hle.

Real hian zanin dar 12:30-ah AS Roma an mikhual dawn a, season hmasaa Champions League semifinal lut thei team an nih avangin Italian club hmachhawn hi a awlsam lo ang.

Inrinni zan khan Real hian an league match-ah Athletic Bilbao chu 1-1 in an inhnehtawkpui a, Thawhṭanniah training an chhunzawm lehnghal! Lopetegui-a'n tlawm chunga Champions League season bul ṭan a tum lo.

Group G inkhel dangah zanin dar 12:30 vek hian CSKA Moscow leh Viktoria Plzen te an inhmachhawn dawn a, group-a an awmpui hi Real leh Roma an nih avangin team pahnih tan match hmasaa chak hi a pawimawh ang.

Ronaldo tel loin...

Real Madrid chanchin sawi a nih apiangin Cristiano Ronaldo hming lam rik a ngai leh ṭhin. Juventus-in an chawi hleitheih loh nomawi chawi duhin Turin lamah Ronaldo an hruai lut a, Portuguese forward tel loin Champions League-ah Real eng nge an an dawn, tih hi thil hriat chakawm chu a ni.

Cristiano Ronaldo hi season hmasa khan Champions League-a goal khung hnem ber niin goal 15 a khung a, Ronaldo tel loin Real hian engtinnge Europe-a club inelna sang ber hi an hmachhawn ang, tih chu hriat chakawm a ni.

Mahse, Real forward Gareth Bale erawhin Ronaldo a ngai lo - kum 33 mi forward chhuah hnuah an team an inlungrual sawt thu a sawi! Bale chuan, "Player langsar tak neih leh neih loh chu a danglam ngei tur a ni.

"Mahse, mi pakhat ṭhatna tura khel loin team pumpui tan kan khel ta zawk a, thawhhona ṭha tak kan neih avangin a hma zawng aiin team kan hahdam zawk," a ti daih a, Ronaldo tel loin an ṭha zawkah a ngai!

Real thar chu

Nipui transfer bazar-ah Real-in player thar lalut hnem lo mah se coach thar an neih miau avangin khelh dan phung a dang a, player khelhtir dan pawh a in ang lo - hei vang hian Real hi 'team thar' tia sawi pawh a awm lo hran lo.

Zidane hnuaia hmun pawimawh chang phak lo Bale chu Real innghahna a ni tawh a, tun season-ah match nga khelin goal thum a khung tling der tawh a, ṭhiante goal khung tur siamsak kawngah a thawhhlawk viau bawk.

Lopetegui-a'n 4-2-3-1 leh 4-3-3 formation a inhman chhawk a, Gareth Bale, Isco, Karim Benzema leh Marco Asensio te chu a hman 'regular' niin Roma tan anni pali hi an hnawk leh ang.

Real hian tun season-a an competitive match hmasa berah Atletico Madrid chu UEFA Super Cup khelhpuiin an chak lo a, a hnua league match vawi li an khelh tawhah erawh an la tlawm lo - vawi thum hnehna changin vawi khat an khingpui an inhnehtawkpui a ni.

Roma ve thung

AS Roma-in nipui transfer laiin player 11 an lalut a, insiamṭhat an tum tih a chiang - an beisei ang result erawh an la hlawh chhuak rih lo hle. Serie A match li an khelh tawhah vawi khat chiah an la chak a, vawi khat tlawmin vawi hnih an khingpui an inhnehtawkpui.

Italian club hian season hmasaa an chet ṭhat nana thawhhlawk tak goalkeeper Alisson chu Liverpool lakah an chan a, Radja Nainggolan chu Inter Milan lamah kaltirin Kevin Strootman chuan Marseille lam a pan bawk.

Roma hian heng player rual hi chan mah se hming langsar leh beiseiawm tak tak Justin Kluivert, Javier Pastore, Robin Olsen leh Steven Nzonzi te an lalut a, beisei la phak rih lo mah se an khelh fuh ni a nih phawt chuan Real hneh turin theihna an nei.

Hriat tel atana ṭha chu Roma leh Real hi pre-season tour-ah khan an lo intawng tawh a, Real Madrid-in 2-1 in hnehna an chang. Asensio leh Bale ten Real tan goal an khung a, Roma-in he inkhela goal khungtu Strootman kawl tawh lo mah se season hmasa Champions League-a goal riat khung thei Edin Dzeko an kawl tih hriat tel sak a ṭha.